آخار. آذ محمد احمدیزادنین "یالنیزلیغین اؤتسینده" شعیرینی تقدیم ائدیر:

یالقیزلیغین اؤته‌سینده

ایچریده بیر یئرلرده
تام دا ذهنین درینلیگینده
قورخونج بیر اژدها یووا سالیب کؤیول ایچینده
یالقیزلیق اودونو پوسکوردور قان دامارلارینا
یاخیب یاندیریر
روح هوجره‌لرینده قاینایان جوشقویو

بیلمیرم نه وار؟
بلکی ده ماغارانین اؤته‌سینده
یالقیزلیقدان داها دهشتلی بیر قارانلیق اؤلکه وار
یا دا سونسوز بیر حوضور
بیتمه‌ین بیر دلی‌لیک

ایستیرم جسارتیمی‌توپلاییب ساواشام
بلیرسیز اؤلکه‌یه آددیملاریمی‌باسام
آمما یالقیزلیق قورخوسو
آتیر منی باغیملیلیغین قوجاغینا
سیغینیرام دینه
و یا اویوشدوروجویا
دوشونورم بلکی آزاتسینلار اونون اودونو
بلکی وطن سئورلیک
و یا اینجه‌صنعت
ساکینلشتیرسین اونون قورخوسونو

جسارتیمی‌ییغسام دا بیر گون اووجلاریما
اوستون گلسم ده باغیملیقلاریما
اوز قویسام دا قورخونون او تایینا
گئنه بوشلوغون قورخوسو
ذهنیمی‌باغیملی ساخلایاجاق باغیملیلیغا