آخار. آذ گونای نریمان حسنلینین "آختاریر" شعیرینی تقدیم ائدیر:

دنیزه آتیلان داشا دؤنموشم،
بیر عؤمور آختارسان تاپا بیلمزسن.
تاپسان دا سن منی نئینه‌یه‌جکسن؟
من اؤزوم-اؤزومو تاپا بیلمیرم.
دیلیم قیفیل ووروب لال حسلریمه
بیر «آچار» سؤزونو تاپا بیلمیرم.
تاپسان دا سن منی نئینه‌یه‌جک‌سن؟
دیلی لال،
گؤزو کور،
عقلی دم-دم.
سؤیله بئله‌سینی نئینه‌یه‌جکسه‌ن؟
درددن مانقورتلاشیب،
خیالی هرده‌م.
ائله هئی ایتیریر،
آختاریر هردن.
او نیی آختاریر، نیه آختاریر؟
او کیمی آختاریر، ندن آختاریر؟
اب‌دی دونیایا گئدن آختاریر
بیر تابوت سلامی گؤندرمک اوچون.
سؤیله بئله‌سینی نئینه‌یه‌جک‌سه‌ن؟
یئرین گؤبیینی تاپیب کسه‌جک،
واخت‌سیز آناسین‌دان آییرماق اوچون.
قارین قولو اولوب اورک یئیه‌جک،
اوریینین دردی آزدی دئیه‌سه‌ن
دردینین قارنینی دویورماق اوچون.
او کی دردلرینین یورد آناسیدی،
ایستمز بالاسی آجیندان اؤله.
آختاریر، آختاریر،
او درد آختاریر،
دردینین قارنینی دویورماق اوچون.
سؤیله بئله‌سینی نئینه‌یه‌جک‌سه‌ن؟
او کی سئوینجینی یئللره وئریب.
بزکلی-دوزکلی دردی آختاریر،
دردینین گؤزونو دویورماق اوچون.