خالق ماهنیسی ( ساری بۆلبۆل ) دن اقتباس

کولت.آذ گونئی‌لی یاکاموز تخللوصو ایله تانینان شاعر "حبیب ساسانیان"نین شعرینی تقدیم ائدیر:

وطن باغری دوْلو قان دی

"سسین گلمیر باری بۆلبۆل"

ایگیدلر اوْدونا یاندی

یوْل اۆستۆنده ساری بۆلبۆل.

بۆگۆن اَن چتین دؤوران دی

سوسدوروبلار تاری بۆلبۆل.

بۆلبۆل، دیلیم قاداقلانیب

باغچالاریم آلاخلانیب

وارلیغیمیز آلاولانیب

قارغا اوْلوب ساری بۆلبۆل

بؤلۆنمۆشۆک یاری بۆلبۆل.

بۆلبۆل، خالقین ایشی زاردی

غملر باغریمیزی یاردی

آنا دیلیم ائوده قالدی

مکتب لردن ایراق بۆلبۆل

گَل تۆت بیزدن سوْراق بۆلبۆل.

بیر دوستاغا چؤنۆب وطن

غم سازینی چالیرام من

بو گۆنلره شاهید اوْل سن

سئویللر اغیاری بۆلبۆل

کؤله اوْلما باری بۆلبۆل.

یوْخسوللاریم قان ـ تر تؤکۆر

موباریزلر دوستاق چکیر

مانقوردلار چر توْخوم اکیر

بئجردیرلر خاری بۆلبۆل

شاختا ووروب باری ، بۆلبۆل.

یاکاموزون گؤزۆ نملی

حزین ـ حزین سؤزۆ غملی

اۆرک یارا، اؤزۆ غملی

گَل اوْلگینان یاری بۆلبۆل

اۆچۆب گئتمه باری، بۆلبۆل.

۱۳۹۷/۰۸/۱۳

حبیب ساسانیان