کولت. آذ معصوم جبارپورون "من آجیلار قیزییام" شعیرینی تقدیم ائدیر:

چیلغینجاسینا قوی داغیلیم

سینیم
تؤکولوم
بیتسین بو تامارزی حسرت
قوی
یئنیدن یارالدیم بوینو بوکوک سئوینی
بیلیرسن می؟
بیزیم آرامیزدا
اؤز تیکدیغیمیز دووارلاردان ساوایی
هئچ نه یوخ
قوجاقلا منی
سنی هر تانریدان چوخ سجده ائتمیشم
قوی سیغینیم سنه
منیم هئچ ازلدن اؤلکم اولماییب
لیلیت کؤلگه‌سی‌یم
اؤلومدن یاییلماقدان اؤترو گولومسه‌ییرم
کئشکه
اؤلوم
باشا چکسه بوتولویومو
آجی بارداقداکی ایچکی‌لر کیمی
آخی من آجی‌لار قیزییام!
باخسانا
تانرینین اللری قان قوخویور
قهر دولور شهره
لیلیت تانرینین ساندیخاناسیندا –
نیفرت قایناغینا اسیر دوشور
گل
نئچنجی دونیا ساواشینی باشلات
من
تک باشینا
مینلرجه قان ایچن عسکر
منی تالان ائدین
سنی سئومک سوچو داغیتدی منی…
قان دامیر تانرینین اللریندن
حاووانین اوستونچولوک سسی انسانلیغین اؤلوم- ظفریدیر!
من
گوناه ائده‌جه‌یم
سنده گوناها باتاجاغام
جهننمین لذتین
قوجاغینین بهشتینده تاپاجاغام
گئتمه
گئتمه‌ییندن اؤنجه
هئچ آنلامادیم شعرلرین سایاقلامالارین
بوغازیمدان آل
بارداق بارداق شعر اول
کئفلندیر بو قیزجیغازی آل دوداقلارینلا
اینان
داها هئچ شعر قوجاغیندا یاتمایاجاغام
یارالی سؤزجوکلریمی
سونسوز سئوگیمین –
قول قانادی آلتیندان گؤروشونه گتیره‌جه‌یم!
اوف
سؤزجوک‌لر
شعر
بهانه‌دیر
آیریلیغین سانجیسیندان چاتلاییر شه‌هر
آلفابت‌لر قورشونلانیر سئوگی
قووالا قاچدیسیندا
بو گئجه بیر شعر
اودقونور اؤلور
بوگئجه
دیری دیری
باسدیریلمیش فیکیرلریمین گردک گئجه‌سی‌دیر
قوی چاتلاسین یاماقلی بیر تیکیش…