تانیْش دشمن گؤزۆنۆ آچدیْقدا باجیْ-قارداشلاریْ هله یوُخودایدی، بوُ گۆن بیراز ائرته‌دن دوُرموشدو. دۆنن گۆن اوْرتادان یئریمک یوْخ، یاواشجا یئرده سۆرۆنمه‌یه باشلامیْشدی.

باشیْنی قالدیْریب چئوره‌یه باخدیْ، ایلک اوْلاراق آناسیْنی آختارماق اۆچۆن گؤز دوْلاندیردی؛ آنا اوْ چئوره‌ده دئییلدی بوُ اوْنون، آنانین گؤزۆندن قیْراق، اوْلدوقلاری یئردن چیْخماغا، اؤزگۆرلۆگۆن آنلامین آنلامادان آزاجیْق اوْلسا بئله اؤزگۆرلۆگۆ دادماغا اَن یاخشی چاغ ایدی. خیْردا آیاقلاریْنی یاواش-یاواش یئرده یئریده‌رک بالاجا آددیْملارلا قاباغا گئتمه‌یه باشلادی. بیراز یوْل گلیب دایاندی. گۆنش ساغ یاندان اۆز-باشیْنا چیْرپیردی باشیْنی یوُخاری قوْوزاییب باخدی، اوُجسوز-بوُجاقسیْز گؤی باشیْ‌نین اۆستۆنده اؤزۆنۆ گؤز گؤرۆنجه‌یه قدر سرمیشدی. باشیْنی آشاغی‌یا تیکیب یئری گؤرمک ایسته‌دی ائنی-بوْیو بللی اوْلمایان تانیْمادیغی جانلی‌لار ایکی آیاغی اۆسته گزمکده ایدیلر. بوُنلار آناسی‌نین دئدیگی " انسان "لار اوْلمالی ایدی. ساغ یانیْندا بئش-آلتیْ متر آرا ایله کیچیک بیر جانلی ترپه‌نیردی، بوُ دا ایکی آیاقلی ایدی آنجاق بوُنون اؤزۆندن بؤیۆک اوْلا بیلمزدی. بوُنون گؤزۆنده، گؤدنسیز آغزیْنا بیر شئی گؤتۆروب تئز-تئز اوْیان-بوُیان ائله‌ییردی. داورانیْشی خوْشونا گلیب اونا یاخیْنلاشماق ایسته‌دی. بوُنو گؤرن ایکی آیاقلی بالاجا حیوان گؤی-ه دوْغرو گئتدی. باجیْ-قارداشلارینا ساری دؤنمک ایسته‌دی بیر آن گؤزۆنۆن اؤنۆنده بیر قارالتی گؤردۆ باشیْنی قوْوزاییب گؤی-ه باخدیْ آناسی " بوُ قارقا دیر اؤزۆنۆزۆ هله‌لیک بوُندان قوْرومالی‌سینیز، بؤیۆدۆکدن سوْنرا اوْ اؤزۆن سیزدن قوْرویاجاق " دئمیشدی اوْنو یادا سالیْب وار گۆجۆ ایله قاچماغا چالیْشدی. قارقا جایناقلاریْن اوُزالدیب گؤیدن بوُنون اۆستۆنه شیْغیماقدایدی. اؤزل بیر شاققیْلتی قوُلاغیندا سسله‌نیردی، قارقا نین قانادلاری‌نین سسی ایدی، آرتیْق گۆجدن دۆشۆب اؤزۆنۆ قارقانین جایناقلارینا وئرمه‌یه حاضرلنمیشدی. اوْلدوغو یئرده دایانیب بیراز یئرینه قاچیْرتدی، قوْرخودان قوُلاقلاریْنی شۆش توُتوب تۆکلری بیز-بیز اوْلموشدو، یاشیْل گؤزلری سوْن حدّینه کیمی آچیْلمیشسادا، آنجاق گؤزلری قارقا دان باشقا بیر شئی گؤرمۆردۆ. بیر آن تانیْش بیر سس ائشیتدی، سس چوْخ اوُجا ایدی " میییووو میوووو فیییففف " آناسی اؤزۆنۆ چاتدیْرمیشدی. قارقا آنا پیشیگی گؤررکن آرتیْق دایانا بیلمیه‌جه‌گینی بیلیب اوْو-وندان واز کئچدی. بالاجا پیشیک اؤزۆنۆ آناسیْنا چاتدیْردی باشیْنی آناسیْنین قیْچلارینا سۆرتۆب اوْنون ال-آیاغینا دوْلاشدی. آنا پیشیک تام بیر آنا سئوگی‌سی ایله بالاسینی یالاماغا باشلادی سوْنرا آغزیْنی آچیْب دیشلری ایله بالاسینین پئیسریندن یاپیْشیب اوْنو یوُوالارینا آپاردی. آنانین دیشلری، اوْنون ایستی نفسی بالاسینین اۆره‌گینی یئرینه گتیردی. قوْرخودان دۆشمۆش، قوْرخونج بیر اوْلایی یاشایان بالاجا پیشیک یوُوالاریْندا اوْبیری بالاجا پیشیکلرله بیرگه آنانین دؤشلرینی اممه‌یه باشلادیلار. یئییب دوْیاندان سوْنرا بالاجا پیشیک : " آنا من ده سن قدر اوْلدوقدا داها دشمنیم اوْلمایاجاق می ؟ " " یاشامیْندا هر آن دشمنلرین اوْلاجاق "دئدی آناسی. " کیملر ؟ " "

چوْخلو دشمنلرین اوْلاجاق آنجاق اَن قوْرخونجلاری ایچینده یاشایان قوْرخو ایله اؤزۆمۆزه تای پیشیکلر دیر.

" فرخ جرایدی، یورغون