کولت. آذ خلیل رضا اولوتورکون "منیم دیلیم" شعیرینی تقدیم ائدیر:

لایلا دئدیم یاتاسان،
قیزیلگوله باتاسان...
-هاردان گلیر بو سس-صدا؟
بلکه ایللر آرخاسین‌دا
لایلا چالیر گلین آنا؟
دؤرد قولاج ایپ
بیر یویرویو بند ائلمیش کهکشانا.
لایلا چالیر گلین آنا،
یئللندیکجه کیچیک یویروک
گئدیب دییر بو اولدوزدان او اولدوزا.
لایلا آخیر… چوجوق باخیر،
بس نه اوچون مورگولمیر؟
بایاق آنا سودو امیب
ایندی آنا روحو امیر.
ایللر اؤتدو یاشا دولدوم.
آنلادیم کی، آنا دیلیم،
اورییم‌دن چیخماز منیم!
آنلادیم کی، سینه‌م‌ده‌کی سؤزلر دئییل،
بابالارین نفسی‌دیر.
دیزلریمه طاقت، قوت،
گؤزلریمه ایشیق وئره‌ن،
چنلیبئل‌ده آت اوینادیب،
شیمشکلرله قوشا گئدن
ایگیدلرین نعره‌سی‌دیر.
بو دیل‌ده‌دیر یوز عابده، مین عابده،
خیلافتی پارچالایان بابکیمین غضبی ده.
محو اولارسا بیر گون بو دیل،
گؤیگؤل اوندا گؤیگؤل دئییل،
قوشقار اوندا قوشقار دئییل.
اؤز دیلینی سن قالا بیل!
غربه، شرقه ایشیق ساچان
فضولینی سن قالا بیل!
ساغدیر دیلیم،
دئمک، ساغدیر میلیارد یاشلی مملکتیم.
یوز هدفه توش ائتمیشم
صابیرین هر سطرینی من
سالخیم-سالخیم نوش ائتمیشم
شهدینی من، عطرینی من.
زامان‌دان زامانا، عصردن عصره
ووروشلا یول گلن داوالی دیلیم،
بابک قیلینجینین داوامی دیلیم!
کیم قورویا بیلمییرسه اؤز یوردونو- یوواسینی،
اودماسین یورد هاواسینی.
کیم قورومور اؤز دیلینی ،
ایتسین منیم گؤزومدن قوی ایلیم-ایلیم!
او ساحلی بو ساحلله بیرلشدیره‌ن
پولاد کؤرپوم، قیلینجیمدیر،
گونشیمدیر منیم دیلیم!!!