کولت. آذ شاهانه موشویق قیزی نین "تنهالیق" شعیرینی تقدیم ائدیر:

تنهالیغین رسمینی چک، رسسام.

بیر آز آیدین چک،

قاریشیق اولماسین.

قاریشیقلیغین اولماماسی‌دیر

تنهالیق.

داغینیق ساچلار چک،

کوله یین بؤیوک بیر سیله

اوزونه داغیتدیغی

ساچلارین خفیف توخونوشلا دوزلده نین اولماماسی‌دیر

تنهالیق.

تنهالیق قاپی آغزینداکی سنه عایید

بیر جوت آیاق قابی‌دیر،

اونلار دا داریخار تکلیک‌دن

سنین کیمی.

هر زامان اوزو قاپییا طرف دایانار،

بیرینین حسرتینده اولان

سئودالیلار کیمی.

تنهالیق دانیشماغا کیمسه‌نی تاپمایاندا

چای تؤکدویون ایستکانلا صحبتیندیر،

دینله‌یه‌نین بئله اولماز،

دانیشماغی اونوتمایاسان دئیه دانیشارسان

هاوادان، سودان،

آروادینی دؤیه‌ن قونشو کیشی‌دن،

یئنی قالماقال یارادان موغننی‌دن،

گئجیکن آوتوبوس‌دان

و داها ندن...ندن...

دانیشارسان، دانیشارسان...

...سوسارسان،

کیمدن‌سه جاواب گؤزلیرسن،

اما سن سوسان‌دا دونیا سوسار سانکی،

سوکوت باشلایار.

اوندا بوز دیوارلار اوزونه هایقیرار تنهالیغینی.

اوتانارسان...

سوسارسان...

تنهالیق سویوق قیش گئجه‌سینده

یورغان‌دان چؤل‌ده قولوندور،

اؤرتن تاپیلماز.

تئلئویزورا باخارکن دیوان‌داجا یوخویا گئتمه یین‌دیر

تنهالیق،

سسله‌ییب اویادان اولماز.

آسیلقاندان آسدیغین تک پالتودور

تنهالیق...

گوزگولره اولان قورخوندور،

هر کسین سنی ترک ائتدیی دونیادا

سن ده کوسرسن

گوزگوده‌کی "سن"دن.

تنهالیق اؤلومسوزلویوندور،

چونکی تنها آدامی اؤلوم بئله اونودار.