کولت. آذ دومان بختیارینین "یاغیش آلتیندا" شعیرینی تقدیم ائدیر:

یاغیش آلتیندا دومان ایسلاندی،
اللری یانماغی اؤیرنمه‌دی کی!
ایکی گؤز پنجره‌دن آسلاندی،
یاغیش آلتیندا یانان سؤنمه‌دی کی!

کؤلگه‌سی سیندی دوواردان سونرا
قوورولوب لال شهرین دیل دوداغی.
یازیلیر قارقیشا قاردان سونرا
بو سوبای آرزیلارین کؤرپه چاغی.

بو سحرسیزلیگی دانماق اولمور،
گئجه بایقوش، گئجه اخساتدی منی.
قار یاغیر بوردا دایانماق اولمور،
گئییرم اگنیمه یورغون کوچه‌نی.

بو یولون گؤزلری یاغمورلانمیش
گئجه‌لر شعری دوداقلانمایاجاق.
بیری وار بیر کوچه‌لیک ایسلانمیش
قارا سئودا اودونا یانمایاجاق.

یازیلان دردی دوداقدان دردیم،
تاپشیرین یاز یاراسین باغلاماسین!
سؤز وئریب بیر کپنک گؤندردیم،
یاغیش آلتیندا یازین آغلاماسین!