کولت. آز حبیب ساسانیانین "تراکتور" فوتبول کلوبونا حصر ائتدیی شعری تقدیم ائدیر:

تیراختور یوردوموزون زیروه لرده قارتالی

دیلیمیزین شکری -ناباتی -قندی، بالی

شاختا بوْرانلی ائلین چیچکلنمیش باهاری

سسیمیزی هایقیران دیرچلیشین دیره گی

قیرخ میلیون آزربایجان تۆرکلرینین اۆره گی.

قهرمانلار یوردونون ایدمانچیلیق سیمگه سی

قاداقلانمیش حاقلارین دیلیمیزین گۆر سسی

ایگیدلر اؤلکه سینین یئنی دیلی - نفسی

سسیمیزی هایقیران دیرچلیشین دیره گی

قیرخ میلیون آزربایجان تۆرکلرینین اۆره گی.

بارسلوْن دان ژاپونا تۆرکلرین تمثیلچی سی

قاراباغین شوشاسی قاراداغین دا میسی

قارداشلیغین بیرلیگین قوزئی -گۆنئی کؤرپۆسۆ

سسیمیزی هایقیران دیرچلیشین دیره گی

قیرخ میلیون آزربایجان تۆرکلرینین اۆره گی.

یئنی دن بیرلشدیرن همدانی زنگانی

اردبیلی -تبریزی، اورمو قاشقای موغانی

اراک قزوین کرجی ساوه خلج تهرانی

سسیمیزی هایقیران دیرچلیشین دیره گی

قیرخ میلیون آزربایجان تۆرکلرینین اۆره گی.

خوْراسان تۆرکلرینین آرزی گؤزۆ دیله گی

پیچاخچی نین کیرماندا سوسموش دیلی اۆره گی

تۆرکمانین ماهنیسی ایگید آرخا کۆره گی

سسیمیزی هایقیران دیرچلیشین دیره گی

قیرخ میلیون آزربایجان تۆرکلرینین اۆره گی.

سینیرلاری سیندیران یئنی اوْیون، یارادان

آرینمیش لکه لردن، آغ بوْیادان - قارادان

یاکاموزو ایناملا گله جه یه یاشادان

سسیمیزی هایقیران دیرچلیشین دیره گی

قیرخ میلیون آزربایجان تۆرکلرینین دیله گی.