Kult.az هوشنگ جعفرینین "شکیل" آدلی شعرینی تقدیم ائدیر:

بیر ائلی بوْراندا قاردا چکه‌جم

بیر ائلی باهاردا واردا چکه‌جم

بیر شکیل چکه‌جم گؤز گیله‌سینه
آرزیلار دۆزۆله سلسله‌سینه
بیر باهار سالاجام قیْش چیله‌سینه
بیر لالا خوْنچاسیْن قاردا چکه‌جم

بیر داغیْ چکه‌جم دۇمان ایچینده
بیر یاخشیْ بیتیرم یامان ایچینده
بیر حاققی دوْغرۇلدام گۆمان ایچینده
شاخدادا بیر آغاج باردا چکه‌جم

بیر سئلی چکه‌جم سارا قوْینۇندا
بیر دیلی آسیْلیْ چاردا قوْینۇندا
بیر ائلی یاردیْم‌سیْز یارا قوْینۇندا
بیر دیلی دیلچک‌سیز داردا چکه‌جم

تیکیلی بیر آغیْز، چکه‌جم بۇما
بیر درین باخیْش کی، فکره جۇما
یوْللایام شکیلین تهرانا، قم-ا
بیر ائلین یوْخلۇغۇن واردا چکه‌جم

بیر ایْشیْق چکه‌جم اۇزاقدان آتیْب
بیر دنیز چکه‌جم دنیزه باتیْب
بیر ائلی چکه‌جم مین ایلدی یاتیْب
وارلیْغیْن بیلمیرم هاردا چکه‌جم

نئیله‌ییم دیل‌سیز بیر باش چکنمیرم
سینه‌مده اۆرک وار، داش چکنمیرم
ائلیمین گؤزۆنده، یاش چکنمیرم
بو ائلین ماهنیْسیْن، تاردا چکه‌جم
ائلیمی بوراندا، قاردا چکه‌جم

هوشنگ جعفری، زنگانلی