کولت. آز گونئی‌لی یازیچی رقیه کبیرینین "آجلیق باراتاسی" کیتابین‌دان بیر حیصه‌نی تقدیم ائدیر:

شیرشیرا باشیندا نئچه نفر بیر کیشینین باشینا تؤکولوب، اونو دؤیورلر. پهلوان اورتایا گیریب «أل ساخلایین گؤروم، بیر نفره نئچه نفر؟»، دئییر. دؤینلر پهلوانین حؤرمتینه کیشیدن أل چکیرلر. دؤیولموش کیشی ایسه ألینده‌کی جینقو کاسانی یالاییر. دئیه‌سن، بیر آن اؤنجه اؤلونجه دؤیولوب، تاپدالانان آدام هئچ او دئییلمیش. پهلوان‌ناییب اونون داورانیشینا چاش‌باش قالیب. دؤین کیشیلرین بیری دئییر: «کؤپه‌اوغلونو قویسان منیم گؤ...مو ده یالار بااا...»

«گَده او شیله‌نی آپاریردیم یئرده یاتاخ قالمیش ننه‌مه...»

«گؤر نئجه باشی‌داشلی اولموشوخ کی، گوٍنون گوٍن‌اوْرتا چاغی آدامین ألینده‌کینی ألیننن آلیرلار...»

دؤیولن کیشی کاسانی یالاییب قورتاریب، یئردن قالخیب، نئچه یئردن جیریلیب سؤکولموش پالتارینین توْز- توْرپاغینی سیلکه‌‌له‌ییب، دئدی: «نوْلار صاباحکی پاییمی دا ایندی دؤیون آمما او شیله‌دن بیر کاسا دا منه وئرین!»

پهلوان‌‌ناییب اونو دؤوره‌له‌ین باشقا آداملار کیمی قالیب کی کیشینین سؤزونه گوٍلسون یوخسا...