Kult.az خلف آذرینین "سنی ایستییر" شعیرینی تقدیم ائدیر:

یوللارینا بویلانیرام هر آخشام،

کور اولوبدو گؤزوم سنی ایستییر.

اوجالاندا گؤی اوزونه فریادیم.

کلمه‌م سنی، سؤزوم سنی ایستییر.

غریب قالیب باغچامیزدا بیر چیچک،

بوینو بوکوک، قلبی قیریق، یتیم تک.

تور اوستون‌ده بسلدیین هؤرومچک،

بو اوت باسان ایزیم، سنی ایستییر.

قم اوستون‌ده کؤکلنمیشه‌م بو سحر،

آغیلارلا بسلنمیشم بو سحر.

یئنه یامان کؤورلمیشم بو سحر،

داغیم، دره‌م، دوزوم سنی ایستییر.

داغیلمیشام، فیکریم ، حیسیم دربدر،

گولر اوزوم سن‌سیز اولوب غم، کدر.

گؤز یاشیمدان، سویا دؤنه‌ن جمله‌لر،

آغ ورقده یازیم، سنی ایستییر.

کدر منی داشا باسیب بو ائوده،

یاغمالاییب، کسیب، آسیب بو ائوده،

دؤن گئرییه! سن‌سیز، کاسیب بو ائوده،

چوخوم سنی ، آزیم سنی ایستییر.

کور اولوبدو گؤزوم، سنی ایستییر.