Kult.az رامیز رؤوشنین «ایلاهی، آل منی بونون الین‌دن...»شعیرینی تقدیم ائدیر:

بیلمیرم، هایاندان تاپدی عؤمرومو،

بیر دلی آت کیمی چاپدی عؤمرومو،

داغلارا، داشلارا چیرپدی عؤمرومو،

قدریمی بیلمدی بو آدام منیم،-

ایلاهی، آل منی بونون الین‌دن!

ایلاهی، کاش منی بو یئر اوزونده

بیر اؤزگه آداما توش ائیلییدین،

لاپ منی آدام یوخ، قوش ائیلییدین،

لاپ بئله بیر قارا داش ائیلییدین،

منی بو آداما سن نئجه قییدین،-

ایلاهی، آل منی بونون الین‌دن!

آل منی، وئر منی، اؤزگه‌لره وئر،

سینیق آینالارا، گوزگولره وئر،

بؤلونوم، یوز تیکه، مین تیکه اولوم

بو آدام اوزومه باخا بیلمه‌سین.

منی آینالارین قیریقلاریندان

توپلایا بیلمه‌سین، ییغا بیلمه‌سین.

بؤلونسم، دردیم ده بؤلوندو بلکه،

هر دردیم یوز تیکه، مین تیکه اولدو.

بیر دردیم قالمادی اؤزومدن یئکه،

بوتون دردلریمدن من یئکه اولدوم.

بو یئرین اوستونده، گؤیون آلتیندا

بؤلونسم، هر تیکم بیر یانا دوشسه،

هاچانسا، کئفینین خوش ساعتیندا،

ایلاهی، تزه‌دن یادینا دوشسم،

تزه‌دن توپلاسان قیریقلاریمی

سینیق اللریمی، آیاقلاریمی،

آغزیمی، بورنومو، قولاقلاریمی،

ایلاهی، تزه‌دن جالاسان منی،

دونیانین ان گؤزل گوزگوسو اوللام.

تزه‌دن دونیایا یوللاسان منی،

بو آدام اولمارام، اؤزگه‌سی اوللام،-

ایلاهی، آل منی بونون الین‌دن!...