کولت.آذ گونئ‌لی تانینمیش میللی-مدنی فعال و حکیم "لطیف حسنی‌"نین ۲۱ آذر له باغلی یازیسینی تقدیم ائدیر:

قاراباسما
گئجه ییدی
یئنه ده منی
یوخو یوللاریندا قاراباسیردی:"تاریخین ان ایرنج یئتیرمه لر
او گوناهسیز، او تکلنمیش ائلیمین
نازلی بئشیینه قوشون چکیبدی
بیر یاشلی کورپه لر داردان آسیلمیش
بیر یاشلی کورپه لر گولله لنیبدی
قانلی بئشیکلری باغرینا باسیب
اوخشایا اوخشایا ییرغالایاراق
سودو آندیم اولان گول آنالارین
وای بالام ناله سی یوردو بورویور
توخونور گونشه نامحرم الی
قیزیل ساچلاریندان توتوب سورویور
اودور باخ!
شهرین میدانلاریندا
قالاق-قالق کتابلاردی قالانیر
قودوز دوشمن لرین ایت نفسینده
واراقلانیب واراق-واراق اودلانیر
او منیم تورکلویوم اوزگورلویومدو
او منیم اولایان دیلیمدی یانیر
یئنیلمیش عسگر تک شهردن چیخدیم
شهردن سورگونه بیر یول اوزانیب
بوردا توره دیلن دهشته سن باخ
یولون قیراغیندا کوللاردا یانیب
ملعون بیرزاماندا مغلوب اولموشام
بئله بیر زاماندا اولمک ایستیرم
نبی سیز، بابک سیز چاغی نیلیدم
نیلیرم نبی سیز ،بابک سیز چاغی
چاغی سیز نیلیرم بابکی،نبی"
آیلدیم بو قورخونج آغیر یوخودان
سن دئمه یوخودا ساییقلامیشام
یورغانی اوستومدن قیراغا آتیب
قان تر ایچینده من آیاغا قالخدیم
ایشیغی یاندیریب ایستر-ایستمز
باغلی پنجره نین بارماقلیغیندان
آزجانا بویلانیب ائشیگه باخدیم
گویدن نارین-نارین یاغیش یاغیردی
قایدیب یئریمه دوننده گوزوم
دووار اوزه رینده تقویمه دوشدو
آذر ۲۱ ۱۳۹۷
ایندی تک باشیما بوردا اوتوروب
اوزوم اوز-اوزومو من آووداراق
او ائرکن یاشیندا شهید ائدیلمیش
جمهورییتی‌مین یاسین توتموشام

()

رجائی شهر تورمه سی ۱۳۹۷