کولت آذ گونئی‌لی شاعر اوستاد آیریلمازین "آزربایجان" آدلی شعرینی تقدیم ائدیر:

آذربایجان آنا یوردوم دیاریم ‌
اعتباریم ایفتیخاریم ووقاریم.
ستارخانیم خان ائیوازیم نیگاریم.
سنسیز حیات جننت اولسا نئیلیرم.
دونیا دولو ثروت اولسا نئیلیرم.

حیدربابا یازیب گئتدی شهریار.
او منظومه ائله وئردی اعتیبار.
حئیف اولا ائل اولمادی بختیار.
ایللر بویو اسیر قالدی ائلیمیز.
اؤز حاققیندان دانیشادی دیلیمیز‌.

هاوا دولدو ایلدیریملار شاخمادی.
ظالیملری یاندیرمادی یاخمادی.
گلیننرین نه دن اوزوک تاخمادی.
جاواننارین جاوانیکن قوجالدی.
قوجا دونیا بیزدن عجب باج آلدی.

فلک بیزیم قولوموزو باغلادی.
آنالارین سینه سینی داغلادی.
خان باجیلارقارداش دئییب آغلادی.
سئل اولمادی گؤزدن آخان گؤز یاشی.
گونو گوندن غم بورودو داغ داشی.

غم قالاغ تک سینه میزه قالاندی.
حاخدان دئدیک آل قانیمیز جالاندی،
دوست الینن وار یوخوموز تالاندی.
سردار دئییب تعریفله دیک اوباشی.
یادا ساتدی دوغما قارداش قارداشی.

عؤمور بویو آل قانیمیز یالاندی.
کئچمیشلردن نه قالمیشدی تالاندی.
ائله بیل کی وارلیقیمز یالاندی.
نه یازدیلار بیز اوخویوب ایناندیق.
اؤزگه لرین بویاغینا بویاندیق .

قودوزدوشمان باشسیز گؤردو
ائلیمی.
آیاق آلتدا تاپدالادی بئلیمی.
اؤز ائلیمده یاساق ائتدی دیلیمی.
آنا فارسی بالا فارسی دانیشدی.
گؤزوم گؤردو اورک یاندی آلیشدی.

سؤز بیلننر قنیم چیخدی اؤزونه.
بیله بیله اویدو دوشمان سؤزونه.
تیکان اولوب باتدی ائلین گؤزونه.
تاریخ بویو کئچمیشلرین دانیلدی.
اؤز الینن اؤز تاریخی یانیلدی.

ائل بالاسی ائلین دردین قانمادی.
یادا یاندی اؤز ائلینه یانمادی.
حاققین داندی نادانلیقین دانمادی.
تورک اوغلویام دئدی داندی دیلینی.
ائلی آتیب یادا وئردی الینی.

عاوام اولوب دوستو یادی بیلمه دیک.
آغلار گؤزدن آخان یاشی سیلمه دیک.
توی گونوده اینامادیق گولمه دیک.
آیلار ایله دؤندو اولدو محرم.
یئرین سالیب اورکلرده کدر غم.

آزربایجان منیم دینیم ایمانیم.
توپراقینا قوربان اولسون بو جانیم.
شاعیر یازان سؤزه نئجه اینانیم.
وئران اولموش ائلی آباد یازیبلار.
اسیر اولموش خالقی آزاد یازیبلار.

یاد دیلینده یازدیق شئعری دیوانی.
آدیمیزدان سیلدیک آزربایجانی.
جانی ائتدیک اؤزگه لرین قوربانی.
آییلمادیق ایللر بویو یوخلادیق.
دوستو آتیب بیز دوشمانی یوخلادیق.

قودوز دوشمان بیزی بؤلدو آرادان.
نه لر دئییم سینه ده کی یارادان.
اولما بیزی قول یارادیب یارادن؟
بیز ایشله دیک یاد آپاردی بهره سین.
غم بورودو آزربایجان اؤلکه سین.

تانیمادیق هئیدن سالدی یول بیزی.
ساغدان آرتیق آیاقلادی سول بیزی.
بیری نوکر بیری ائتدی قول بیزی.
گونو گوندن اعتبارلار آزالدی.
فلک بیزه خازان وئریب یاز آلدی.

دوشمان اولدوق اؤزوموزه اؤزوموز.
منم دئدیک بیر اولمادی سؤزوموز.
ایندی باخیر یاد الینه گؤزوموز.
دیلنچی لیک اولوب یئنی پئشه میز.
چاققاللارا یاتاغ اولوب مئشه میز.

یادا خاطیر سینه نیزی داغلادیق.
اؤلوسونه دیریسینه آغلادیق.
یاد ساراسین گؤز اوستونده ساخلادیق.
ائل ساراسین تاپشیرمیشیق سئله بیز.
حسرت قالدیق بولبول کیمی گوله بیز.

آزربایجان قهرماننار دیاری.
داغی داشی قوچ ایگیدلر ووقاری.
نه دن اولدون بو نیسگیلین دوچاری.
ایگیدلرین دوشوب سندن آرالی.
دونیا بویو سینون اولدو یارالی.

جیبهه لرده قوربان اولدو قوزوموز.
عربلره پای وئریلدی قیزیمیز.
آیاقلاندی چؤره گیمیز دوزوموز.
یادا وئردیک ائویمیزین چیراغین.
وئران قویدوق آتا بابا اوجاغین.

دار گوننرده دوشمان بیزه ار دئدی.
میسی میزه آلتون دئدی زر دئدی.
داردان چیخیب گولدی بیزه خر دئدی.
اینساننارین آدین حئیوان یازدیلار‌.
دانیشانین مزارینی قازدیلار.

بو نیسگیلی دونیا بیلدی سنده بیل.
سنی آتیب اوستان اولدو اردبیل.
اورکلره داغ چکیبدی بو نیسگیل.
یاد اولوبدو اؤلکه میزه آستارا.
سینه داغلی دیللر باغلی اوز قارا‌.