کولت آذ گونئی‌لی شاعره ملیحه عزیزپور-ون شعرینی تقدیم ائدیر:

ببه!
نییه آغلاییرسان؟
اویونجاغینی-می ایتیریبسن؟
آخ!!!

هانی بس ساغ قولون؟
نه ده گؤزل گؤزلرین وار!
آنان،
زیتون باغلارینا یئریکله-ییب یقین!

آنان- بابان کیم دیر؟
آدینی سوروشمامیشام هئچ!
آدین نه دیر؟
کیم کؤکسونه دامغالاییب
آدینین مجهوللوغونو؟

موسی سان؟
محمد سن؟
کیم سن؟
بلکه مسیح سن عزیزیم؟!!

آخی او بویورموشدو؛
ساغ گؤزونو چیخارتسالار،
سول گؤزونو ایسمارلا.
ساغ قولونو کسسه لر،
سول قولونو ایسمارلا...

- وطنین، ساغی-سولو اولمور کی -
بیلیرم .
آما، کیمسن سن؟
هه !!!
یارالاریندان تانیدیم ایندی!
قاراباغا- تبریزه بنزه-ییرسن.
آدین؛ غززه دیر!

ایندی تانیدیم...
آغلاما قوزوم!
دونیانین باشینا داش دوشور
گؤز یاشلارین.
آغلاما...
باخ!

گؤر نئجه
مودئرن اویونجاقلار وار چئورنده!
گؤزل اویونجاقلاردیر.
دئموکراتچی عمی لر گتیریبلر!

آل اوینات.
آما گؤزله،
سول طرفینی آپارماسین
بو چیچی لر...
گل قوجوما قاداسی!

یوخسا
قان آپاراجاق یئر اوزونو...
اولسون!
نه ده اولسا؛
گئیمه یه کفن یاخشی!
وطن ساغ اولسون
و
سن...!

جهنمی ده جنت دیر
وطنین.
اوزولمه!
دوز، اوره-یینین باشینا گؤمه-جه-یم وطنین؛
وطنسیزلییینی...!
آغلاما...

آرخایین یوم گؤزلرینی.
آرخایین اؤل
قاداسی...!