کولت آذ ووقار نعمت-ین یازیسی‌نی اوخوجولارا تقدیم ائدیر:

آذربایجان اينسانلارينين چوخوندا، کئچميشدن گلن بير اؤزوندن اوتانما دويغوسو وار. بو اوزدن اؤز کولتوروموزون، آناديليميزين و میللی معنوی ده‌یرلریمیزین درده ده‌یمز اولدوغونو دوشونوروک. و باشقالارينا اؤزه‌نيب اونلاری تقليد ائدیريک. (البتته بونون آچیقلانماسی گره‌کن پئسیکولوژیک یؤنلری ده واردیر.) مئديا دا، بون اورتامی اولوشدورماق اوچون بيچيلميش پالتوودور. بو دورومدا دیلیمیزین ياشاماسی اوچون اَن بؤيوک يارديمی بيز طالع‌سیزلر ائده‌بیله‌ریک طبیعی. بيز ده مئديانين الينده اويونجاق اولمازساق اگر.

بیزیم حؤکومت و ایقتیدار «خالقا ائنيب اونلاری بير شئی‌لرين دالینجا سوروکله‌مک و بير شئی‌لره اينانديرماق و آسیمیله ائتمک اوچون مئديانی ایشغال ائتمیش‌لر. مئديا خالقين هم آيناسی، هم ده يول گؤستريجی‌سيدير. دئیه.» (البتته یول گؤسترن دوغرو ایسه اگر)

مئديا ديلی ايسه پوپولار بير ياخلاشيم‌لا اولايلاری، خبرلری، قيساجا مئساژلاری پوپولار بير سؤيلم ايچه‌ريسينه قويار و یازیق جاماعاتا سونار. اؤرنه‌یين؛ ساواش ايچينده‌کی بير اولکه‌نی، پاتلايان بومبالارين ايشيغی‌يلا، آخیر چرشنبه شن‌لییینه بنزه‌ده‌ بيلير. اؤلکه باهالیق، رذالت، اوغرولوق، رانت، تئرور، فساد ایچینده اوزه‌رکن، نوری‌المالکی‌نین یادا بشار اسدین نئجه یاتیب نئجه دورماسینی توم خبر آماجینا چئویریب ایشید (داعش) توخماغینی خلقین گؤز اؤنونده توتا بیلر. يا دا بير ساعاتليق خبر پروقرامی‌نين ياری‌سينی ایمامزاده‌لرده‌کی، موقددس یئرلرده‌کی زییارتچی‌لره آييرا بيلر.

بو گيزلی ايشغالين، توپلو-توفنگلی دوشمان ايشغاليندان چوخ داها آغير اولماسی‌‌نين نه‌دنی، ايشغالا اوغرايان اؤلکه اينسانلارينين یا توپلولوقلارینین، ايشغال حاليندا اولدوقلارينین فرقینده اولمامالاريدير. فرقینده اولماماقدان باشقا، اينسانلار اؤزلوکلریندن ايشغالا اوغراماق اوچون جان آتارلار. ايشغالا ايستکلی و کؤنوللو اولارلار. سؤزو ائديلن بو ايشغالين فرقينده اولماسی گره‌کن‌لرين ايلکی گنج‌لردیرلر. آما اونلارين گؤزو نئجه آچيلاجاق کی؟!..

آنلامسيزليغی او قده‌ر چوخ و او قده‌ر دالبادالا داياییرلارکی، آنلام سيلينير اورتادان. نه‌دن؟ اصلینده بو "نه‌دن" سوروسونو دا هئچ سئوميرلر. نه ائتمک ايسته‌ییرلر؟ دئيه دوشونمه‌ییميزی و دیل اوزونلوغوموزو ايسته‌مه‌ييرلر. باخين، دينله‌يين! يئتر. آنلاماغا گرک يوخ. اصلینده آنلاشيلاجاق بير شئي ده يوخدو هئچ. "گؤزه‌ل واخت کئچيردیریک!.. داها نه ايسته‌ييرسینیز؟! گولون، آغلايين، یاراتدیغیمیز آشاغی و رزیل دوروملا، آغیر معیشت‌له مشغول اولون، يئتر." دئييرلر. ائله ده ائدیریک. آغلاما و سیتقاما موغاببالاری اولدوق آرتیق. اولانا اولمازا آغلاییریق. آغلامازساق، آغلاماغی کادو ائدیب گؤنده‌ره‌رلر ائویمیزین ایچینه! تئلویزیا بوقچاسیندا!...

آرتيق تئلئويزيونداکی هئچ بير شئی خالق اوچون دئیيلدير.. هر شئی حاکیمییت و شووونیست بیر قودرت اوچوندور( حاکیمیت خئیرینه، اونلارین نفعینه). گئت-گئده، باشقا مافیالار دا، اؤزه‌لليکله ده تئلئويزيونداکی بعضی پروقراملار يارديمی‌يلا ایقتیدار اولمانین، شؤهرتلی اولمانين قيسا يوللارينی اؤیره‌نديلر. و پروپاقاندانین چاغداش دونیاداکی گوجونو باشادوشدولر! «تئکنولوژی نادان الینده ضره‌رلی اولار» دئمیش عالیم‌لر. ائله ده اولدو. شووونیزمین، فرهنگی تئروریزمین، آسیمیلاسیونون، پان‌فارسیزمین و آخماقلیغین تریبوناسی اولدو ایران تئلئویزیاسی.
کيمليک آراييشينداکی گنج‌لر ده تئلئویزیانین سوندوغو بو "ایسته‌نیلن اینسان تیپی" قالیبینده‌کی قوندارما کیم‌لییی قوللانماقدا گئجيکمه‌دی. بو گئديش‌له زاتن گنج‌لرله يئتيشکين‌لر بير-بيری‌يله آنلاشابیلمز دوروما گله‌جک‌لر طبیعی.

توم بونلارين آشيلابيلمه‌سی اوچون سانيرام ائیيتيم آلانيندا چاليشان اينسانلارا دوشونور و یازارلاریمیزا بؤيوک گؤرئولر دوشور.
اینسانلاریمیزا دیلداشلاریمیزا دؤندوکده ایسه طبيعی کی، اؤنجه‌ليکله اؤزوموزه دؤنمه‌میز، اؤزوموزو دوشونمه‌میز، اؤزوموزله باريشيق اولماميز، یانی اؤزوموز اولمامیز گره‌ک...