کولت آذ روستم بهرودی-نین شعرینی اوخوجولارا تقدیم ائدیر:

هر شئى كدرلی‌دیر، هر شئى
گؤى اوزو، دنيز، آى، گمى
نه اولار، منی ده آل، گؤتور
آپار، آى گمى، آى گمى!

آل گؤتور، اؤلدوردو منى
بو باليق، يوسون قوخوسو
منيم ياريمچيق نغمه‌مى
قوى باشقالارى اوخوسون!

باغرى چاتلار بو گئجه‌نين
گل، تلس، دئمه كى، واخت وار
چيخيب گئتمه‌يه قورولوب
اونسوزدا، بوتون ساعاتلار

هامى تكدى، تنهادى،
هر كس او تكليك‌دن باخير
يئر اوزونده بو واختاجان
كيم كيمى تانيدى آخى؟!...

گوناهيمى يويارمى هئچ
گؤزومدن تؤكدويوم ياشلار؟
عفو ائله‌يين اوشاق واختى
يوواسين پوزدوغوم قوشلار!

هر شئى كدرلی‌دى، هر شئى
گؤى اوزو، دنيز، آى، گمى...
نه اولار، منی ده آل گؤتور
آپار آى گمى، آى گمى!...