Kult.az گونئی‌لی یازار داوود اهرینین "قار دنه‌لری اویناییریق" آدلی حکایه‌سینی تقدیم ائدیر:

صبحانه‌دن سونرا پالتارلاريمي گئيديم. پيلله‌لردن ائنر- ائنمز، آنام برك چاغيردي:

– كتابخانايا ايسته‌ييرسن گئده‌سن كارتين ياديندان چيخماسين.

تعجّوبلندیم. بو باره‌ده اونا بير سؤز دئمه‌ميشديم. آچيق آغيزايلا قاييتديم. ياديما دوشدو کی كارتيمي گؤتورمگی اونوتموشام. كارتي گؤتوردوم، پيلله‌لردن ائنديم. آناما بير سؤز دئمه‌ديم. ائودن چيخديم ائشيگه.

اليمين اشاره‌سي ايله تاكسي داياندي. سوروجو چيغيردي:

– كتابخانايا ايسته ييرسن گئده‌سن، مين!

تعجّوبدن آز قاليردي بوينوز چيخاردام. ياواش قاپيني آچديم و مينديم. آمما سوروجویه بير سؤز دئمه‌ديم.

كیتابخانادا كي ميزين داليسيندا دورموش بير گنج مسئول مني گؤرجك گولدو و دئدي:

– چوخ خوش گليبسيز. كارتيز لطفن. دكتر ژيواگونون كتابيني ايسته‌ييرسيز. بير آز صبر ائله‌يين. الآن گتيره‌رم.

تعجّوبلو گؤزلرايله اونا باخديم. كارتيمي وئرديم.جرأتيم يوخ ايدي سوروشام‌هارادان بيلميشدي كي گلميشم همان كتابي امانت آلام.

بير نئچه دقيقه‌دن سونرا كتاب الينده قاييتدي. بؤيوك كارتدا بير شئي‌لر يازدي و كتابي منه وئردي.

كتابخانادان ائشيگه چيخديم. اؤز- اؤزومه دئديم اولمايا ساحاتلارين عقربه‌لري بو گون عكسينه ايشله‌يير و يا يئر گئتمك يولونو ده‌ييشيبدير. رواني آداملار كيمي كتاب قولتوغومدا پييادا پاركا طرف يولا دوشدوم. ايسته‌ييرديم بير آز‌دا يول گئده‌م. شهريميزين يالقيز، هميشه قاپيسي باغلانميش سينماسي‌نين قارشيسيندا بير اسكي دوست كناريمدان كئچيردي. بيربيريميزين اوزوموزه باخديق. ال وئرديك. سلام عليكدن سونرا دئدي:

– پاركا تشريف آپاريرسيز ، يولوزدان قويمويام.

تعجّوبله اوزونه باخديم. اوندان آيريلديم. قار باشلادي ياغماغا. قارين آغ دنه‌لري اوينايا- اوينايا اوستو باشيما اوتوروردو. بير يولدان كئچن قارشيدان گليردي. ياخينليغيما يئتيشن کیمی، دايانیب و سوروشدو:

– آقا ساحات نئچه دير؟ واي باغيشلايين گره‌ك سيزدن بو سؤالي ائله‌مه‌يه ايديم. سيز چوخداندير داها ساحاتيز اولمايير.

يولوما داوام وئرديم. دؤرد يولون باشيندا بير قوجا كيشي چرخ اوستونده لب‌لبي ساتيردي. ساري و قرمزي لب‌لبي‌لردن بوخار قالخيردي. اؤز- اؤزومه دئديم ياخشي‌دير كي ياريم كيلو دا لب لبي آلام. قوجا كيشي‌نين ياخينليغينا يئتيشركن قاه-قاه باشلادي گولمه‌يه و ياواش قولاغيما دئدي:

– نييه ياريم كيلو؟ قوي بير كيلو چكيم. لب‌لبي‌لريم ايستي و شيريندير. نگران اولما فريزر تورباسينا قوياجاغام.

بير كيلو لب‌لبي‌نين پولونو وئرديم. فريزر تورباسي اليمده، كتاب‌‌ایسه قولتوغومدا، نهایت پاركا يئتيشديم. اؤزومه دئديم كاش بير قزئته‌ده گتيره ايديم کی نيمكت اوستونده قويوب اوتورايديم.

بير كيشي قزئته الينده كئچيردي. دؤندو، اوزون منه توتوب دئدي:

– بلي. اؤزوز ايله قزئته گتيرمه‌ييبسيز. آلين، من اوخوموشام. ائله‌يه بيلرسيز نيمكت اوستونه سریب، اوستونده اوتوراسيز.

تعجّوبله قزئته‌ني آلديم. تشكر ائله‌ديم.

بیر گنج قيز و اوغلان پاركي ترك ائديرديلر. قيز اوغلانا دئدي:

– دوزدور. اوجوردور. دوغرودان يئني قرينه. ايش قورتاريبدير…!

نيمكتده قزئته اوستونده اوتورموشدوم. قار آرام آرام ياغيردي. بير قارقا گولونج حالتده قاريلداييردي. قالخديم. بير يولو سئچديم كي تئز ائوه يئتيشم. قار هله ياغيردي.

***

قاپيني آچيب، پيلله‌لردن قالخديم. آنام بير خانيم ايلا دانيشيردي. ائشيتديم كي دئييردي:

– همان اسكي آتا- بابا سؤزو. اوره‌يين اوره‌يه يولو واردير. ايندي داها دوغرودان يولو واردير…!

گولوشلری‌نین سسي اوجالدي. قاييتديم. پيلله‌لردن سرعتله ائنيرديم. آمما سانكي پيلله‌لرين سونو يوخ‌ايدي. كیتاب و فريزر تورباسين آتديم. ائله پيلله‌لردن ائنيرديم. قيزيشميشديم. بير- بير پالتارلاريمي چيخارديرديم. تر دابانيمدان سوزوردو. پيلله‌لره قورتاراجاق يوخ ايدي…

***

آنامين سسي مني اوياتدي. نفس نفس ووروردوم. عجيبه يوخو گؤرموشدوم. قالخديم.

صبحانه‌دن سونرا پالتارلاريمي گئيديم. پيلله‌لردن ائنر- ائنمز، آنام برك چاغيردي:

– كتابخانايا ايسته‌ييرسن گئده‌سن كارتين ياديندان چيخماسين.

و من اصلن تعجّوبلنمه‌دیم.

تاكسي سوروجوسو، كیتابخانا مسئولو، اسكي دوست، يولدان كئچن، قوجا لب‌لبي ساتان، او كيشي كي قزئته الينده ايدي و او قيز و اوغلان كي اينديجه پاركي ترك ائتديلر، همان سؤزلري دئديلر.

پاركدا نيمكت اوستونده ، قزئته اوستونده اوتورموشام. فريزر تورباسي بير كيلو لب‌لبي ايله و دكتر ژيواگو كیتابي منيمله‌ديرلر .قار آرام آرام ياغير.

بير قارقا گولونج حالتينده قاريلدايير. یالنیز منیم ائوه قاییتماغا جرأتيم يوخدور. اختيارسيز آیاغا قالخیرام کی ائویمیزه تئز یئتیشن بیر یول سئچم. قار هله ده ياغير…!