چئویرن: فرخ جرایدی

یوْلجو لارین گؤزو ، جوُلفا دۆزۆنۆن باشیْندا اوْلان داغ بوُرنونا دیکیلمیشدی. بوُنونلا بیرگه قیزلارا باخان و اوْنلاری باشدان-آیاغا گؤزدن کئچیرنلرده آز دگییلدی. لاکین قیزلار بوُنلارین هئچ بیرینه اؤنم وئرمیردی. یوْلجو لار دره دۆزۆ باخدیْغی اۆچۆن قیـْزلارین دا گؤزلری اوْ طرفه دیکیلمیشدی. اوُزاقدان گؤرونن هر بیر قارالتی اۆزلرده بؤیوک بیر سئوینج اوْیادیردی.

فقط بیراز کئچندن سوْنرا یئنه ده اومودسوزلیک دوْغولدو. داغ بوُرنوندا توْپلانمیش قارالتیْلار قوُزئی کۆله‌گینین قارشیْسیندا دیرنیش گؤسترمه دن داغیْلیب گئدیردی.

اتومبیل گلمه‌جه‌گینی بیلیردیم ، چۆنکۆ انقلاب حرکاتی گئنیشلندیگیندن جوُلفا - تبریز یوْلوندا کی حرکتین غیر عادی بیر شَکیل آلاجاغی آیدیْن ایدی . بعضن اتومبیل-ین هفته لرله گلمه‌دیگینی ده سؤیله ییردیلر.

یوْلجو لار آراسیْندا جۆر به جۆر سسلر ائشیدیلیردی :

- واللاه من بو دؤلت لرین ایشینه لاپ معطّلم . ایشه قاریْشیب بئش-اوْن نفر لوْتو-پوْتو نو ، یئرینده اوْتورتمورلار. انقلاب بیزیم نَییمیزه گره‌کدیر ؟ مگر بیز ایندیه قَدر آزاد دئییلدیک می ؟ تجارت دایانیب ، آلیْش - وئریش ، گئدیش - گلیش کسیلیبدیر .

- اگر توْرپاق بیزیم دیر سه من چوْخ یاخشی تانییرام ، بیزدن هئچ بیر شئی چیخماز . وئره‌ک اوُروسا ، اینگیلیسه قوُرتارسین ، گئتسین. یوْخسا بئله گئتسه توْرپاق و مۆلک ساخلاماق دا مۆمکۆن اوْلمایاجاق.

- جانیْم انقلاب ایندی هارادا؟ هامیسی دین سیزلیک... هامیسی ولدالزنالیق. بوُدور باخ هله محکم انقلاب اوْلمامیش بوُ گۆنه دۆشمۆشۆک . یاغیش-ین آلتیندا قیْریریلیریق. کلامُ اللاه-ا آند اوْلسون آند اوْلسون چاغیْردیغیم حسین-ه ! بوُنلار مدنییتی پوْزاجاقلار. نه روحانی تانییرلار ، نه حلال ، نه حرام قانیْرلار.

- آللاه اؤزو بوُنلارین جزاسیْنی وئره‌جک . نَییمیزه لازیم مشروطه ؟ بیر شئی کی قُران‌دا یوْخدور ، کیمین نَیینه لازیمدیر ؟
- بلکه ده سیزه لازیم دئییلدیر ؛ چۆنکۆ احتیاجینیز یوْخدور ، آما بیزه لازیمدیر.

بوُ جۆر سسلری چوْخ ائشیدیردیم . یانیْمدا دوُران گنج قیْزلارین صبری تۆکنمیشدی. کیچیک قیْز بؤیوگه مراجعت له : « ایراندا بوُ فلاکتین سببی سنسن. من ایرانی تاریخده اوْخوماق ایسته‌مزدیم . »- دئیه ، باجی سیْنی تنقید ائدیر دی. بؤیوک قیز اوْنو ساکیت ائتمه یه چالیْشاراق : « داریْخما ، بیزه بوُرادا بیر قوْرخو یوْخدور ، بوُرا روسیه مۆستملکه سیدیر. هر بیر روس بوُرادا حاکم دیر . بوُنلار اَن عادی بیر روس-دان بؤیوک آللاه دان قوْرخدوقلاری کیمی قوْرخورلار.» دئدی.

کیچیک قیْز چوْخ آجیْقلاندی : « سوُس ! روسجا دانیْشما . مۆستملکه خالقیْنین حاکم میللتلری گؤرمه‌یه گؤزو یوْخدور . مۆمکۆن اوْلدوقجا روسجا دانیْشماغی بوُراخ . شرق لیلرین روسلاری گؤره‌جک گؤزلری یوْخدور . سن بیلیر سن می بیز هارداییق ؟ روُسلارین ، خالقی سوْن کؤینه‌گینه قدر سوْیدوغو بیر یئرده. »

-« بیلیرم ، بیلیرم ، بیزه هئچ بیر شئی اوْلماز . شرق لیلر قادینلارا اؤزللیکله ساری ساچلی قیْزلارا سوْن درجه ده سایغی بسله ییرلر . بوُنو من بیر چوْخلاریندان ائشیتمیشم. »

-« بوُ بیزیم اوچون داها دا قوْرخولودور. بوُنلار بیزی گؤزلری ایله یئمک ایسته ییرلر. بیزی بوُنلارین الیندن نه کیمی قوُّه قوُرتارا بیلر؟»
بوُ صؤحبتلردن سوْنرا بؤیوک قیزدا تیتره‌ییر و آغلاییردی. اوْ آرتیْق جاواب وئرمیردی . بوُنو گؤرر کن کیچیک قیز مذمّت ائیله‌مکدن واز کئچدی و دئدی « آغلاما ، ایرآیدا ، هر نه اوْلوبسا کئچیبدیر. باخاق گؤره‌ک طالئعیمیز بیزه نه وئره جکدیر .