کولت آز. یعقوب نیکزادین " وطن یادا دوشدو" شعرینی اوخوجولارا تقدیم ائدیر:

یئنه
وطن یادا دوشدو
آجی سانجی توتدو دویغوم
سیزیلدادیم حسرتیمی
گیله- گیله
گیزیلده دی شان تمللی قورولتایلار
سیرغالاندی قولاغیمدا اوخشامالار
سیندیردیلار باشی داشلی اوره ییمی
گؤیرچینی دوغرادیلار گؤزلریمده
قوپارتدیلار دیله ییمی دوداغیمدان
پارچالاندی قارا باغریم
چالیخلادی قان ایچینده قارا باغیم.

آه وطن!
قیندا قیلینج اؤز- اؤزونو یئییب توکدو
جانا گلدی دیلیمیزده داش قیفیللار
قولوموزدا دار قانداللار
ساپینی گمیریر بالتا
قمه
سوسویور قانینا اللریمده.
سویوش یاغیر بولودلارین امجه ییندن
ساچین یولور اوجا داغلار
چَپَرلنیب آینا- بولاق، دورنالارا
آرامیزی آراز آدلی زَهَر کسیب
ایکی دیللی ایلان کیمی

تبریز سنی سوووتقاییر
اورمو داکی گؤز- گؤز یارا دوز ایچینده
اردبیل ده آزادلیقی دوغرادیلار
زنگان داکی پیچاقلاری همدان دا اوخلادیلار

اوره ییمیز داش ایچینده
گؤزلریمیز یاش ایچینده
من ده
دوروم گلیم بو گون
داغی- داشی بوکه- بوکه
من قاداسی
من جاناسی
مندن موغایات اولمالی
مندن هادیر

منده تانری دوغمالاشیب
منده ایلمک لنیب مچید
منده قرآن چیچک لنیب
منده مَلَک سئویشمه ده
من گلیرم باسقین لیغی قیرام، قوپام
حیات تاپام.
کلبجر دن آذان چکه م؛
" اولو تانری"
شوشا، لاچین توپراغیندا
"جانا " دییه م جانامازین گولوشونه
" اشهد اَن"
" حی علی" و اوچ نوقطه
قولوم آچیق
دیلیم آچیق
ناماز قیلام او آلاچیق، بو آلاچیق
من گلیرم کؤرپو سالام گؤروشلرین آراسیندا
گل باریشاق
بیز بورجونو وئرمدیک سه
امه یینی حالال ائله
دوز- چوره یین حورمتینه!

نه اومورسان تک صبیره اینانان دان؟
بورانی اوسکورک توتوب
بورانی ایناق دالاییب
قان قوسدورور وطنداشیم کوچه میزده
دیل آچماغیم اولوب قاخینج
اوزوم گولونج
ایشیم ایرنج
اتیم آجی
من لیییمی باشا قاخیر ساتقین قونشو
دار دیبینده یاشاییرام
داغیلمیشام پارچالانمیش گوزگو کیمی
دومان گئیمیش یاماجلارا
آرامیزدا دووارلانیب آراز آدی
آغی قوسور
ایتیرمیشم کلفچه نی
سینیخیب دی دیلیمده سوز
سینسیییب دی اوره ییمده آرزولاریم
قارغانیب دی قارانلیقا باخیشلاریم
اپریییب دی پرده- پرده ماهنی لاریم
یانیق کرم دویمه لنیب عشق اودونا
اصلی ایتیب دستانلاردا
کوله دونوب سئویشمه لر.

اووفف وطن!
نه اولاردی قورتارایدیم
قانداللارین قابار- قابار کؤلگه سیندن
قاسناق- قاسناق چارتلاغیندان
کؤزمه- کؤزمه سیزاغیندان
جیغیر- جیغیر قانچیلیندان
بو اؤلکه ده.

نه اولاردی یول تاپایدیم
جئیران بیتن قایالارا
سریله یدیم یاغیش کیمی یول اوزونه
سیلکینه یدیم کال یوخودان
یاناشایدیم توپراغینلا
جالانایدیم بارماغینلا ساز کؤکونه
تئلدن- تئله
اؤپوشه یدیم بولاغینلا
دورنا- دورنا
سئویشه یدیم باخیشینین ناخیشی لا
ایلمه- ایلمه
ایپک- ایپک
دانیشایدیم دوداغینلا گلین لرین بوخچاسیندان
نانای- نانای

سو سپه یدیم کوچه لره
"یار گلنده توز اولماسین"
قوووشایدی ایکی قارداش
او تای بو تای
دییه م آشیق چالما داها " یانیخ کرم"
یا " قاراباغ شیکسته سی"
چال آشیق ، چال
" باش ساری تئل" ، " چوبان یایلاق"
اوخو آشیق!
" وطن باغی آل - الواندی
سسین گلسین ساری بولبول"