Kult.az گؤرکم‌لی آذربایجان شاعری ممد آسلانین ۲۰ یانوار شهیدلرینه حصر ائتدیی "آغلا قرنفیل آغلا" شعیرینی تقدیم ائدیر:

آغلا، قره‌نفیل، آغلا
سینه‌لر گولّه-گولّه،
قان آخیر، دؤنور گوله.
قره‌نفیللر آغلاییر،
دوشمه‌نه گوله-گوله.
آغلا، قره‌نفیل، آغلا!

قره‌نفیللر قوشادی،
ایکیسی باش-باشادی.
سیزدن قالان گونلری
قره‌نفیللر یاشادی.
آغلا، قره‌نفیل، آغلا!

قره‌نفیل - شهید قانی،
آغلا، قره‌نفیل، آغلا!
آغلا، اینلت میدانی،
آغلا، قره‌نفیل، آغلا!

جاوانلارا قییدیلار،
تانکلار آلتدا قویدولار.
قانین ایچیب دویدولار،
آغلا، قره‌نفیل، آغلا!

هر شهیده بیر دوزوم،
آبشرون - قان دنیزیم.
سن - منیم آغلار گؤزوم،
آغلا، قره‌نفیل، آغلا!

اوزاق منزیل، آجی یول،
یولدو، یول، علاجی یول!
شهیدلره باجی اول؛
آغلا، قره‌نفیل، آغلا!

کربلا - قان چؤللره،
پوچ اولان قؤنچه‌لره،
نازنین اینجیلره
آغلا، قره‌نفیل، آغلا!

بختی آسیلان قیزا،
هونری آسلان قیزا،
تویو یاس اولان قیزا
آغلا، قره‌نفیل، آغلا!

آغلا، اورک بوشال‌سین،
اونون گؤیه باش آلسین.
آغلا، داغلار یومشال‌سین،
آغلا، قره‌نفیل، آغلا!

بو تکلنمیش شیرلره،
بو آرخاسیز ارلره،
بو تالعسیز نرلره
آغلا، قره‌نفیل، آغلا!

بو گوناهسیز قانلارا،
بو دیدیلمیش جانلارا،
بو جانسیز جاوانلارا
آغلا، قره‌نفیل، آغلا!

بو بدنسیز قوللارا،
بو اوچونان یوللارا،
بو ییه‌سیز قوللارا
آغلا، قره‌نفیل، آغلا!

بو سنگیمز آغرییا،
بو قان سیزان سارغییا،
بو الله‌سیز قورغویا
آغلا، قره‌نفیل، آغلا!

بو قارا یازیلارا،
بو کؤرپه قوزولارا،
قورویان آرزولارا
آغلا، قره‌نفیل، آغلا!

خیره شر اوستون گلدی،
اینیلتیلی اون گلدی...
آغلامالی گون گلدی،
آغلا، قره‌نفیل، آغلا!