۲۰ یانوار فاجعهسینه حصر اولونور
تورالین چوخلو اویونجاقلاری وار ایدی. اونون اوچون باباسی دا، ننهسی ده، آتا-آناسی دا چوخلو اویونجاق آلمیشدی. حتی بیبیسی، خالاسی، عمیسی ده اونا اویونجاق باغیشلامیشدیلار. چونکی هامی بیلیردی کی، تورال اویونجاق هوسکاریدیر. اگر کیمسه باشقا شهره گئتسیدی، تورال اونا اویونجاق آلیب گتیرمهسینی تاپشیراردی. هامی اونون خاسیتینی یاخشی بیلیردی. اودور کی، تئز-تئز سوروشاردیلار:
- تورال، گئتدییمیز یئردن سنینچون نه گتیرک. کؤنلون نه ایستییر؟
- تورال، کوستیوم آلیم، ایستییرسن؟
- تورال بالا، سنینچون پالتو آلیم؟
تورالینسا یالنیز بیر ایستیی واردی و هامییا دا عینی سؤزو دئیردی:
- منیم اوچون اویونجاق آل. من اویونجاق ایستییرم.
ایکی یاشیندان اونون اوچون اویونجاق آلینیردی. ایندیسه تورال، باباسی دئمیشکهن، "یئکه کیشی" ایدی - آلتی یاشینین ایچریسیندیدی. بو ایللر اونا او قدر اویونجاق گتیرمیشدیلر، او قدر اویونجاق هدییه وئرمیشدیلر کی، نه سایی واردی، نه ده حسابی. اوشاق اوتاغینین دئمک اولار کی، تن یاریسینی تورالین اویونجاقلاری توتوردو. تورالین تکجه اؤلکهمیزده بوراخیلمیش دئییل، دونیانین بیر چوخ اؤلکهلریندن گتیریلمیش اویونجاقلاری وار ایدی. ائوه کیم گلسیدی، تورال ایمکان تاپیب اؤز اویونجاقلارینی گؤستریر و اونلار حاقیندا بیر-بیر معلومات دا وئریردی.
- باخ، - دئییردی، - بو آیینی-میشکانی عمیم آلیب. بو ماشینی بابام موسکوادان گتیریب. بو دوهنی آتام کوبادان گتیریب...
بئلهلیکله، تورال اؤز اویونجاقلارینی سلیقه ایله گؤستردیی کیمی، سلیقه ایله ده اؤز یئرینه ییغیردی.
آخیر واختلار تورالین چوخ سئودیی آتاسینین آلدیغی آوتومات توفنگ، تانک، بئتئئر ایدی.
اونون آوتوماتینین تتیینی چکهنده لاپ اصل آوتومات سلاحی کیمی ت... ررر...ر! سس چیخاریردی و ایشیق ساچیردی. سحردن آخشاما کیمی او، آوتوماتی چینیندن آسیر، هردن ده گاه ننهسینه، گاه دا آناسینا، ان چوخ دا کیچیک باجیسی آیانا توشلاییب "اللر یوخاری!" دئییردی. بیر بالاجا علینی گئج قالدیرسایدی، او دقیقه ده آوتومات ایشه دوشور، تیریلداییردی. بئله واخت کیملییندن آسیلی اولمادان تورالین قارشیسینداکی هر ایکی علینی قالدیرمالییدی. ان چوخ دا آیان و ننهسی اونون "اسیری" اولوردولار.
کئچهن ایلین آخیرلاریندا تورالین آتاسی موسکوایا گئتملیدی. بونو ائشیدن تورال چوخ سئویندی. او، آتاسینا دئدی:
- آتا، منیم اوچون موسکوادان نه آلاجاقسان؟
- نه ایستهسهن، اوغلوم، - دئیه آتاسی اونون ساچینی اوخشادی. - سنین اوچون ده، آیان اوچون ده اوریینیزدن نه کئچسه آلاجاغام.
- آتا، منیمچون کوکلا، اؤزو ده گؤزلری گؤی اولسون، - دئیه آیان آتاسینین بوینونو قوجاقلادی.
آتاسی:
- باش اوسته، قیزیم، - دئدی. بس تورال نه ایستییر؟
- آتا، من آوتومات توفنگ ایستییرم. تورال اؤز ایستیینی بئله بیلدیردی.
- اوغلوم، سنین کی آوتومات توفنگین وار.
- یوخ، آتا، بوندان یوخ. بیلیرسن، آتا، او گون صادقده گؤرموشهم. اونون توفنگی ائله گؤزلدیر کی، هم ده گوللهسی ده وار ائی، هه، آتا، باخ من او آوتوماتدان ایستییرم.
- بئله دئ، - آتاسی گولدو. دئمهلی، گولله آتان آوتومات ایستییرسن.
- هه، آتا، باخ، بئلنچیینی ایستییرم.
- باش اوسته، تورال. اوندان دا یاخشیسینی آلیب گتیرهجهیهم.
بیر نئچه گوندن سونرا تورالین آتاسی موسکوادان قاییدیب گلدی. او، تورال اوچون ایستدیی توفنگی و بیر ده بؤیوک بیر تانک آلیب گتیرمیشدی. آوتوماتین تتیینی چکهن کیمی، او، برکدن شاققیلداییر، آلوو کیمی ایشیق بوراخیر و بیر نئچه گوللهنی آردیجیل آتیردی. تانکین اوستونده هرلنهن دایره و اونون دا بؤیرونده بیر لوله اوزانیردی. اولجه تورال بونون نه اولدوغونو بیلمهدی. آتاسیندان سوروشدو.
- اوغلوم، بو، معاصر تانکدیر. اؤلکهمیزین زهملی سلاحلاریندان بیریدیر. هئچ بیر گولله، فیلان کئچیرمیر. اوستوندهکی ایسه پولئمیوتدور. الله ائلمهسین، اگر محاربه اولسا، اوندا بیزیم عسگرلر بو تانکلارا اوتوروب، باخ بیر، اوغلوم، هم اوندان توپ آتشی ایله، هم اوستوندهکی بو پولئمیوتلا دوشمهنی دؤرد طرفدن بیچیب-تؤکهجکدیر.
آتاسی فخرله تورالا بونلاری دئییردی.
تورال یامان سئوینیردی. ائودکیلره گاه توپدان، گاه دا آوتومات توفنگیندن آتش آچیر و دئییردی:
- آیان، باخ، سنی ووردوم. سن اؤلورسهن. اؤل!!!
آیان او دقیقه یئره اوزانیر، گؤزلرینی یوموردو و - تویای، من اؤیدوم - دئییردی.
سونرا تورال ننهسینی، باباسینی، بیر سؤزله، قاباغینا چیخانی گاه تانک، گاه دا آوتومات آتشی ایله بو جور ووروب "اؤلدوروردو".
۱۹۹۰-جی ایل یانوار آیینین سویوق گونلریندن بیریدی. همین گون ندنسه، آخشام تئلئویزور ایشلهمهدی. دئدیلر کی، تئلئویزییا ایستودییاسیندا قزا باش وئریب. او آخشام تورال بیر قدر توپو، توفنگی، تاپانچاسی ایله اوینادی. سونرا دا یاتدی.
تورالی هله بو واختا کیمی ائشیتمدیی قریبه و قورخونج سس اویاتدی. او، گؤزلرینی آچیب اطرافینا باخدی. آتا-آناسی یوخ ایدی. شهردهسه برک آتیشما سسی گلیردی. بئله قورخونج سسی او آنجاق محاربهلی فیلملرده ائشیتمیشدی. سس گئتدیکجه داها دا آرتیر و ائله بیل هم ده یاخینلاشیردی. بس آتا-آناسی هارادادیر؟ یان اوتاقدان دانیشیق سسی گلیردی. تورال یاتاقدان قالخیب یان اوتاغا کئچدی. آیاندان باشقا بوتون عائله عضولری بورادایدی. هامینین اوزونده تلاش واردی. آتاسی هئی پاپیروس چکیر، اوتاقدا وار-گلدیدی. ننهسی تورالی قوجاقلادی. پنجرهدن اوچان گوللهلرین ایشیقلاری گؤرونوردو. شهرین هر یئریندن تانکلارین، آوتومات و مینامیوتلارین قورخونج سسینه قیشقیران آداملارین، موختلیف ماشینلارین هیهجانلی سیقناللاری، سسی قاریشمیشدی.
- بو ندیر، ننه؟ - دئیه تورال سوروشدو. اونون سسی تیترییر، بدهنی اسیردی.
- گؤزومون ایشیغی، قورخما، آتیشمادی. سولداتلار شهره گیریرلر.
- نیه، ننه؟ مگر محاربهدیر؟ بس بیزیم سولداتلاریمیز هاردادیر؟
- اؤزوموزکولردیر، بالا. اؤزوموزکولردیر.
بو سؤزدن سونرا تورال بیر داها هئچ بیر شئی سوروشمادی. سوسدو تورال.
سحره قدر آتیشما کسیلمهدی. ائرتهسی گون گوندوز ده شهرده نه سس-کوی کسیلدی، نه ده آتیشما. او گون هئچ کیم ائودهن باییرا چیخمادی. خبر وئرمیشدیلر کی، هئچ کیم ائودهن چیخماسین. ائوده هامی کدرلیدی، قاشقاباقلییدی، نه دینیر، نه ده دانیشیردیلار. تورال بیر شئی باشا دوشموردو. آنجاق هیسس ائدیردی کی، یاخشی هئچ بیر شئی یوخدور. نه رادیو ایشلییردی، نه ده تئلئویزور. کوچهلرده ماشینلار دا گؤرونموردو. شهر بومبوز بوزارمیشدی. اوردا-بوردا ایسه هله ده کیمهسه، نیهسه آتشلر آچیلیردی. همین حادثهدن ایکی گون سونرا آداملار شهرین مرکزینه آخیشدیلار. هامی دا قارا گئیینمیشدی. تورال بو دفعه ده ننهسیندن سوروشدو:
- ننه، بس بو آداملار هارا گئدیرلر؟
- آزادلیق میدانینا، بالا.
ننهنین گؤزلرینده یاش گیلهلهندی.
- بس نیه قارا گئیینیبلر ائی، ننه؟
- بو گون شهیدلر دفن اولونان گوندور. اونون اوچون بوتون خالق قارا گئیینیب.
- شهیدلر کیملردیر، ننه؟
- آتان سنی باشا سالار. اونلار گوناهسیز وطن اوغوللاریدیر. آتان دا گئدهجک.
دئیرهم سنی ده آپارار.
آتاسی ایله تورال چوخ چتینلیکله گلیب داغوستو پارکا چاتدیلار. بوتون شهر بورادایدی. یوللار بویو تانکلار، بئتئئرلر و آوتوماتلی سولداتلار گؤردو تورال. اینسانلار ایسه هئچ نیه باخمادان کدرلی، هوزنلو حالدا آخین-آخین بورا گلیردی. بیر آزدان چیینلرده قیرمیزی مافهیه بورونموش شهیدلری خیابانا گتیردیلر. اللردهکی شکیللردن گؤرونوردو کی، اؤلدورولهنلرین هامیسی جاوانلاردیر. بیر نئچه اوشاق شکلی ده گؤردو تورال. هامی آغلاییردی. هئچ واخت تورال آتاسینی آغلایان گؤرممیشدی. ایندی اونون آتاسی دا آغلاییردی. تورالین دا گؤزلری دولموشدو.
- آتا، - تورالین سسی، سانکی بوغولموشدو. بونلاری کیم اؤلدوروب؟
آتاسی اونو قوجاغینا قالدیردی.
- گؤردویون تانکلار، بئتئئرلر، بیر ده آوتوماتلار - دئدی.
تورال داها بیر سؤز دئمهدی.
آخشاموستو اونلار ائوه دؤندولر. تورال ائوه گیرهن کیمی اوتاغینا جومدو. بیر آزدان بالکوندا سس ائشیدیلدی، نسه قیریق-قیریق سیندیریلیردی. تورالین آتاسی پنجرهیه یاخینلاشدی. تورال آغیر چکیجله اؤز تانکینی، آوتومات توفنگینی، آتاسینین تزه آلدیغی بئتئئری و تاپانجانی بیر-بیر سیندیریردی. اونون گؤزلرینده یاش واردی. سینیق-سینیق ائدیلمیش "سلاحلارینی" ائیواندان آشاغی توللادی. سونرا اوتاغا گیردی. آتاسی اونو گؤروب باشینی آشاغی ایدی...
