Kult.az گنج شاعر افسانه روانین شغیرلرینی تقدیم ائدیر:

کیریییب خاطره‌لر بیر قادینین دیلین‌ده

سوکوتونا قاپانیب واهیمه‌سی، قورخوسو،
کیریییب خاطره‌لر بیر قادینین دیلین‌ده.
سانکی عرشه چکیلیب گؤزلرینین یوخوسو،
اسیر قالیب عؤمورلوک آیریلیغین الین‌ده.

وعده‌سیز دن دوشوبدو سیغالسیز تئللرینه،
ییخیلیر یوللارینین بوشلوغوندا او قادین.
هر گون لعنت یاغدیریر اوشویه‌ن اللرینه،
باغیشلامیر قلبینین داشلیغینی او قادین.

گئجه‌لر خیال قوروب، گون آغلاییر اؤزونه،
یوخولار یاستیغینی دئشیر سحره کیمی.
اوووج-اوووج دعالار گؤندریر گؤی اوزونه،
گؤره‌ن گلیب چاتیرمی، سیزین شهره کیمی.

قاییدیرسان، قاییت گل، دییشسین احوالینی،
کوچه-کوچه اوزاق‌لیق نه دئمک‌دیر بیلیرسن؟
بیر گون چیخار قارشینا سوروشارسان حالینی.
«سن‌سیزه‌م» دئیه بیلمز اوتانارسان اؤلرسه‌ن.

کوچه-کوچه داریخان قادین

بیرجه دفعه باخیشینلا،

دردی-غمی آتیردیم.
گئجه‌لری کیرپیینی،
سایا-سایا یاتیردیم.

ائله گئتدین-
گؤزلریم‌دن
داملا-داملا سوزولدون.
باخدیم پنجره-پنجره،
قاییتمادین، اوزولدوم.

ایندی داها سنی ائو-ائو،
آختارمیرام، گزمیرم.
ایندی داها قورورومو،
آددیم-آددیم ازمیرم.

بو شهرین هر دؤنگه‌سی،
هر دالانی شاهیدیم.
سنین اوچون کوچه-کوچه،
داریخان قادین ایدیم...

کیرپیین‌دن آسارسان

تکلیینه سیغیندیغین شهرده،
بس‌می سنه میناره‌لر، دنیزلر؟
اوشوتمزمی سویوقلوغوم قلبینی،
ساچلارینی کولکلرمی عزیزلر؟

هله اؤلمه، من‌دن قاچیب گئدنیم،
من‌سیز اؤلمه، گؤزونو کیم باغلایار؟
بیر کؤینک‌لیک حسرت یاندیرار سنی،
من اوزی بولودلاریمی آغلایار؟

منیم سئوگیم مین دعادان توتارلی،
اما سن ده، مین اؤلودن بئترسن.
اینده‌ن بئله یوز ایل کئچسه اؤلدویوم،
امین اول کی، یوز ایلیمه یئترسه‌ن.

بیزیم سئوگی ناغیلینین شهری،
بیر دنیدی،
کوچه‌لری بیز قوخان.
کیرپیینده بارماغیمین ایزلری،
اللرین‌ده یوخولاریم،
من یوخام...

گول قیزینین قوخوسونو اونوتما،
اؤلن منه‌م، گؤز یاشینی قوروتما،
آی سئودییم، گلیب منی گؤرمه‌سه‌ن،
قوربان اولوم سس ائلمه، اویاتما.

بیلیرسن‌می، سحره‌جه‌ن یاغیشلار،
پنجره‌نی داشلایاجاق، آچارسان.
بو گئجه‌نی، بو سفرلیک یولا وئر،
سحر منی کیرپیین‌دن آسارسان.