کولت آذ سهراب طاهرین شعرینی اوخوجولارا تقدیم ائدیر:

دئمیشدیم بیر داها سئومییه‌جه‌یم،
بس نییه بیر داها سهو ائتدی اورک؟
بو سهوین قیزاران گون باتیمیندا،
منی قوزو کیمی مه‌لتدی اورک.

نئجه ده آغیردی بو سئوگی - سوغات،
هارایا چاپیرسان، آی یهرسیز آت؟
منی کیتاب کیمی بوکوب ایکی قات،
صحیفه - صحیفه سئیر ائتدی اورک.

تاپ اونو، تاپ اونو، مهربان فالچی،
نه‌دیر داغ سینه‌می یاخان بو سانجی،
او بیر ناغیل اولدو، من بیر ناغیلچی،
دانیشیب، هامینی کؤورلتدی اورک.

اونا اؤیود وئردیم، سؤزومو کسدی،
بو منه بیرینجی، سونونجو درسدی،
دئدیم گل یاپیشاق دونیادان، بسدی،
باشیما دونیانی هرلتدی اورک.

یاندی اؤزو یانمیش دونیا حالیما،
دوشدو سینیق سسلر عؤمور والیما،
بولود گؤزلرینی سیخدی یولوما،
منه آغلاماغی اؤیرتدی اورک.

منه حارام ائتدی مئیی، مزه‌نی،
روسوای ائده‌جه‌یم، سؤیله‌دی سنی،
او میزراب، من پرده، دیندیریب منی،
قیزلارین یانیندا ترلتدی اورک.