کولت آذ گونئی‌لی شاعیر اوستاد آیریلمازین شعرینی تقدیم ائدیر:

حاققین یولون بیز آزیریق ،
دؤرد ایلدن بیر دؤرد ایلدن بیر،
اؤزوموزه گوز قازیریق ،
دؤرد ایلدن بیر دؤرد ایلدن بیر،

دئییرلر رای وئرین بیزه ،
بیز ایشلییگ اؤزوموزه ،
شربت شیرینی وئرروک سیزه ،
دؤرد ایلدن بیر دؤرد ایلدن بیر،

ایش یوخ بئکار دولانیریق ،
هر بویاغا بویانیریق،
یالان سؤزه اینانیریق ،
دؤرد ایلدن بیر دؤرد ایلدن بیر ،

حاکیم اولوب ایپی قیریق ،
دوز یول اولوب بیریق بیریق،
اؤزوموزو آللادیریق ،
دؤرد ایلدن بیر دؤرد ایلدن بیر ،

بیز آللاهین نیشانه سی ،
چیخماسین اعتراض سسی،
چکرسوز آزاد نفسی ،
دؤرد ایلدن بیر دؤرد ایلدن بیر ،

جانی باغیشلادیق سیزه ،
قوی یاشایش اولسون تزه،
بارماغیزی وئرین بیزه ،
دؤرد ایلدن بیر دؤرد ایلدن بیر ،

قولدور وکیل اولور شورا ،
بو میللته تله قورا ،
بیز دوشوروک یئنی تورا ،
دؤرد ایلدن بیر دؤرد ایلدن بیر ،

شیطان ملک دونون گئییر،
رایه خاطیر احسان وئریر ،
اژدر عمی پیلو یئییر ،
دؤرد ایلدن بیر دؤرد ایلدن بیر ،

ایلیمیزین یوخدو یازی ،
دیلیمیز وار هانی یازی ؟
یاندیریرلار آیریلمازی ،
دؤرد ایلدن بیر دؤرد ایلدن بیر ،