کولت آذ گونئی‌لی تانینمیش شاعیر و آراشدیرماچی حبیب ساسانیانین شعرینی تقدیم ائدیر:

خسته یم حسرت دن خسته یم درد دن

اۆرکده، خسته تک نار هاواسی وار

دؤنمه رم وطنین عشقیندن بیر آن

باشیمدا حللاج تک، دار هاواسی وار.

قیلینجلا ایکی یه بؤلۆنن وطن

جان آتیر بیرلَشه، ندنسه اوْلمور!

دربند دن باشلانیب کرکۆکه کیمی

آیریلان بیر ائلین اۆره یی دوْلمور؟!

ایکی یۆزه چاتیب پارچالانماغین

ایندی بیرلَشیگین چاغیدیر، وطن

تئزاردا داغیلیب، شورالار بیتیب

بیر میللت، بیر توْرپاق، یارالی بدن.

بیر زامان آلمان ێن تن اوْرتاسیندان

ایکی ابرقدرت بیر دیوار چکدی

نهایت گۆج گلدی انسان شئیطانا

دیوارین یئرینه، قیزیل گۆل اَکدی.

نه دن بو آیریلیق اوزانسین آرتیق؟

بیزلری گؤزله ییر بیرلشمه آنی

بیر میللت، بیر تورپاق ـ بیر ائل ـ بیر اوْبا

گلین بیرلشدیرک آزربایجانی.

آتالار دئییبلر"ائل بیرلَشرسَه

شۆبهه سیز اوْینادار داغی یئریندن"

آزربایجان دئییب جانیندان قوْرخان

بوْستاندا تَرپتمز تاغی یئریندن.

وطنداش گرکدی وطن یوْلوندا

جانیندان ـ مالیندان فخریله گئچه

وطنداش اوْلماغاین آنلامی درین

یاکاموز آرازدان پاسپورت سوز کئچه.