کولت آذ گونئی‌لی شاعیر و یازار اسماعیل خرمی‌نین"قازانجیم" حکایه‌سینی تقدیم ائدیر:

بئش آلتی سیگارئت چکندن سونرا چالیشدیم بیر آز باشیمی یئره قویوب، گؤزومو یوموم. آنجاق سیگارئت چک‌مک هوه‌سی بیر آندا، منی یاتماغا قویمادی. نه قدر چالیشدیم، هئچ بیر چیخیش یولو تاپا بیلمه‌دیم. سیگارئت‌یمله، گئجه‌نین باغرینی یارسامدا بیتمه‌یینی ایسته‌میردیم. داها دوغروسو مندن سونرا، هامی، سحرین آچیلماسینی، گونش‌ین چیخماسینی گؤزله‌ییردیلر. من ایسه، ایسته‌ییردیم گئجه‌یه یاردیمچی اولاراق، بیر داغین باشینا چیخیب پوسو قوروب، کوچه‌ لاتلاری کیمی گونشین قاباغینی کسیب ساچلاریندان توتوب، دره آغزی آشاغی فریلادیم. سحرین گؤزونه کیرلی و اسگی پارچالاردان جیریب برک - برک باغلاییم. عؤمرومده ایلک کره اولاراق سحری کؤر گؤرمک ایسته‌ییردیم. بوگون، اؤنوموزه چیخان گونش و آچیلماغا تله‌سن سحر موطلق منیم دئییل‌دی. سویوقدان تیر - تیر اسسمده، گونش منیم جانیمی قیزدیرماغا گلمه‌یه‌جکدیر. سحرین منه گؤره، اوره‌یی دؤیونمه‌یه‌جک، سحری مندن بیرآز اوطرفه گودنلر، چوخدور. گونش‌ین چیخماقیندان، چوخلاری، شاعیر اولوب شعر‌ده یازاجاق‌لار، نغمه‌ده قوشاجاق‌لار رسمینی‌ده چکه‌جکلر. دئمک بو گونکو سحره‌، آداخلی گونشین‌ده ییه‌سی من دئییلم. منه دوشمن کسیلمیش چوخلاری کیمی، گونش، سحرله سئویشمه‌یه داوام ائدیب منی آشیب کئچه‌جک. پلمه‌لری ال‌لریله آراییب، اوستومه کیشنه‌یه‌جکدیر.

قاپی سسی گلدی. دئمک گونشله سحرین سئویشمه‌سی، باشلانمیشدی. ایکی کیشی ایچه‌ری گیردی. بیری، منه یازیقلیغی گلدیینی، سؤیله‌دی. باشقاسی، واختدیر دییه اونو، تلسدیرمه‌یه چالیشدی. یئریمدن دورماق ایسته‌میردیم. چاره سیز ایدیم. ائله چاره سیز کی؛ الیم یئردن - گؤیدن اوزولوب، باشی اوسته یئره دوشموشدوم. وورولموش بیر قوش کیمی تورپاغا دوشموشدوم. باشیمدا، آراخامدا بوراخدیق‌لاریمین رسمینی چکیردیم. بوتون سئودیک‌لریم سانکی باشیما ییغیشمیشدی. هامیسی اللرینده، یاشادیغیم خاطیره‌لری گتیرمیشدیلر. خاطیره‌لر، اوچوردولار، آیاق توتوب یئرییردیلر. بیر - بیریله دانیشیردیلار، گولوردولر، آغلاییردیلار. منده اونلارا قوشولوب گولوب آغلاماق ایسته‌ییردیم. آیاغیمین آلتینا بیر- ایکی داش کرپیچ قویوب او ال‌لره دیرماشیب چیخماق ایسته‌ییردیم. هئچ اولماسا، گؤزلریمی قالخیزیب اورا قویا بیلسه ایدیم! او ال‌لری! او ال‌لری بیر داها توتا بیلسه ایدیم، یالاماق ایسته‌یه‌ردیم. آجی - شیرین دادی وئرن بارماقلارین، ایچینه دوشوب چیلپاق‌جاسینا اوزمه‌یی دوشونردیم. باشیمی بیرینین قوجاغیندا کؤرپه‌بیر اوشاق کیمی، گیزلتمک و ایچینده ایتمک ایستردیم. بیر ایمک‌له‌ین اوشاق اولوب یئنی‌دن آنامین دوشوندن بسلنمک ایسته‌ییردیم. هامینین گوناهلارینی بوینوما آلیب باغیرماق باغیرماق و یئنه ده باغیرماق فیکرینده ایدیم.

قول‌لاریمی بیر تیکه چؤره‌یه ساتمیشدیم، ندنسه آیاقلاریمدا منیم دئییلدی. اونلاری، آنلاییب دوشوندویوم، آغیر یوللار، مندن چالمیش‌دیلار. من چالماق دئییرم. بلکه‌ده او یول‌لاردا منسیز، یول‌لاری الینه آلیب، ایز بوراخیردیلار. ایزیمه دوشنلردن قورخموردوم. منی ایزله‌ییب منیم گونومه قالماق‌لاریندان قورخوردوم. بیرآز درینه گئدنده، گئتدیک‌لریم یوللارین، دؤنوشو اولمادیغینی دوشونه‌رک، ایزلرینی، ایچیمده، گیزله‌دیب ساخلامیشدیم. اؤزگه بیر شهرین غوربت‌چیلیینده مامورلاردان گیزلی ساخلانانیب، ایتنلر کیمی.

منه یازیقلیغی گلن آدام تپه‌دن – دیرناغا، منی سوزه‌رک یانینداکینا دئدی: «منجه ال‌لرینی و گؤزلرینی باغلاماغا احتیاج یوخدور. بو بدبخت یئریندن‌ده ترپنه بیلمیر. اؤزونو بتر اودوزوب.» باشقاسی، قانون‌دور دییه؛ اونا قارشی گلرک گؤزلریمی قارا و توزلو بیرپارچا ایله و ال‌لریمی دمیر کلبچه ایله باغلادی. بیر- بیرینین یاردیمی‌لا آیاغا قالخیزدیلار. قاپی آچیلدی سالونا چیخدیق‌دا، سئودییمی قادینی گؤردوم. اووجوندا سو گتیرمیشدی. یادیمدادی بیرگون، سو ایچمه‌یه قابیمیز یوخ ایدی. ایکی اووجومو آچیب دؤنه‌لرجه، اونا سو ایچیرتدمیشیم. سونرالار، بونو یادا سالیب گولردیک. من اونا قوزوم دییه‌ردیم، اودا منه چوبانیم. بیر - ایکی آددیم آتمیشدیم بیر سس ائشیتدیم: «هئی چوبانییییم، چوبانیم باخ سنه اووجومدا سو گتیرمیشم. ایسته‌ییرم؛ من سنه چوبان، سن منه، قوزو اولاسان، بیلیرم ال‌لرین باغلیدی. اؤز باشینا سو ایچه بیلمزسن.» بو حالدا الیمدن یاپیشان عسگر، بیر آز منی بئلیمدن ایته‌له‌دی. دئدی: «یئری قاپیدا هامی بیزی گؤزله‌ییر.» آرخایا دؤنوب باخاندا داها اونو گؤرمه‌دیم.

ایکینجی قاپییا چاتمیشدیق. چیچک قوخولو قیزیم الینده، "او" ایسته‌ییب، من آلا بیلمه‌دییم اویونجاغی، گتیرمیشدی. منی گؤرجک اویونجاغی گؤسته‌ره‌رک دئدی: «ساغ اول آتا جان! یاخشی کی سونوندا، منیم ایسته‌دییم اویونجاغی آلدین. اؤپورم سنی.» گؤزومو یوموب کئشدیم. ایسته‌میردیم داها آرتیق ائشیدم. اوچونجو قاپی‌یا چاتماغی، گؤزومده دوغولان بیر دسته بولود کوچوک‌لری قویمادیلار گؤرم. سونونجو قاپی‌دا آتامین یالنیز قابارلی ال‌لری واریدی. باشیمی اونلارا ساری توتوب اوره‌ییم ایسته‌دیی قدر ایله‌دیم. یئدییم ان دادلی، ان گؤزل چؤرک قوخولاری بوتون جانیمی تیترتدی. اؤپمه‌یه باشلادیم. یالواریردیم بو قابارلی ال‌لرله ویر منی. آتا ویر منی دئییردیم. بدنسیز ال‌لرینی اوزومه چکدی تئل‌لریمی اوخشادی. «آیاغا دور منیم بالام» دئدی. «بو یولدا اولدوقجا الیندن گلنی ائدیب زحمت‌لر چکیبسن. بو حاقی اؤزون قازانیبسان.» آیاغا قالخیب اؤلو جانا نفس گلن کیمی، آددیم‌لاریمی داها سرت آتماغا باشلامیشدیم. سحر یئلی اسیردی. بتون سکی‌سی‌نین اوستونده، منی گؤزله‌ییردیلر.