کولت آذ گونئی‌لی شاعیر تایماز میانالی‌نین شعرینی تقدیم ائدیر:

خياواندان كئچنده گؤردوم بير كاسيب قيز اوشاغى دوروب اويونجاق ساتان توكانين قاباغيندا و چوخ حسرتله اويونجاقلارا باخير چوخ كؤوره ليب بونو يازديم :

حسرتله باخيرسان اويونجاقلارا
دونيا اؤزو اويونجاق دير اويونجاق
دولدوروب دردلرى اوجا داغلارا
قويوبدور چيگنينه دونيا دويونجاق

ندن گؤزلرينى دومان توتوبدور؟
دونيا ليلاج كيمى سنى اوتوبدور
سنين شانسين ندن بئله ياتيبدير؟
غملر دوداغيندا اولوبدور سانجاق

چاتلاق باغيرتيلار بوغازيندادى
شيمشك شاخينتيسى او نازيندادى
كولك لر ، بورانلار بو يازيندادى
گؤزونده كى ياغمور بونداندير آنجاق

شاختالى بورانلى گونلرى گؤردون
آلدين گؤى قورشاغين ساچينى هؤردون
آغرى ماهنيلارين قاشيندا سوردون
آللى ياناغيندان ياغير اوتانجاق

دونيانين گوناهين چكدين بوينونا
گونشى تورلادين آلدين قوينونا
دردسيزلر أل چالدى دونيا اويونونا
تايمازدا گؤينه دى اوره يين يانجاق...