Kult.az مرزییه احمدی اوسکویینین "من گونشی سئویرم" آدلی شعیرینی تقدیم ائدیر:

اوشاقلیق عالمی ایدی

اوره ییم ایشیق ایدی

کیچیک تمیز دونیاما ،

اویون یاراشیق ایدی .

یولداشلاریم دؤورمده هامیسی شاد کینه سیز

بیر آن کوسو اولسایدی ،گئنه باریشیق ایدی .

قارانلیق قورخولویدو ،آمما اوندان قاچمازدیق ،

گئجه لر ناغیللاردا شیرین ،تمیز محبت بیزی باریشدیراردی .
ائله بونا گؤره ده ،

کؤنلوموزون قاپیسین کینه لره آچمازدیق.

ائله بیل گؤزلریمیز گئجه لرده گؤرردی .

بئله ایشقلی گونده ،گؤیه بولود گلسه یدی ،
کئچری کیچیک بولود ، گونون اوستون آلسایدی ،

گئنه ده دسته لشیب ،دورماییب باغیراردیق،

گونشی نغمه لرله قوناق دا چاغیراردیق ،

<<گونوم گئدیب سو ایشسین ,

آبی دونون ده ییشسین...

گونوم ,چیخ ,چیخ >>

آیلار -ایللر دولاندی ...

زامان ناققا بالیق تک ،اوشاقلیغیمی اوددو ،

کئچری غملریمین ،کیچیک سئوینجلریمین ،

یئرین بؤیوک کدرلر ،سؤنمز کینه لر توتدو .

گونش بیزیم اؤلکه دن اوغورلاندی ،توتولدو ،

ایستی ایشیق چشمه سی قورودو و قورتولدو .

ایندی ایللردن بری گئجه لریمی آیسیز ،

گوندوزلریمی گونسوز باشا چاتدیریرام من .

بوهتان یالان آلدانمیش یوردوموزو بورویوب ،

شادلیغین ،سعادتین کؤکو دیبدن قورویوب .

هئچ زاد قارانلیق کیمی منیم کؤنلومو سیخمیر ،

او گؤزل اوشاقلیغیم بیر آن یادیمدان چیخمیر .

ایندی نئجه تابلاشیم بیر بئله قارانلیغا؟

بیرده دوشونورم کی ،گونش تکجه بورادان یوخ ،

آیری اؤلکه لردن ده یامانجا اوغورلانیب .

بونودا دوشونورم :او قارانلیق زیندانی

اوشاقلیقدا اوخویان نغمه لر ییخا بیلمز ،

او قارا دوستاقلاردان یالقیز سس چیخا بیلمز ،

آتا- بابا سؤیله ین <<دمیر چاریق>>

کؤهنه لیب ،

ایندی پولاددان توفنگ ،حدسیز -حساب سیز فیشنگ ،

خالقین سؤنمز عشقیندن بیر ده دایاق لازیمدیر .

هرکس سئوسه گونشی باشقا سئوگیسین آتار،

یورولوب یولدا قالماز ،اونودار اؤزونو ده .

اوزاق داغلار دالیندان گئدیب گونشی تاپار .

اوجا سسله دئییرم :

من گونشی سئویرم!

من گونشی سئویرم!