کولت.آذ گونئی‌لی شاعیره سوسن نواده رضی‌نین شعرینی تقدیم ائدیر:

نه سؤزلر دینج دورور
نه ده من دینج دورورام
سیلاحین سرینلیگینی
هر آن بئینینده حیس ائله‌دیگینده
نئجه یارادیجیلیغا دوشونسون باااااا شاعیر؟
قاراقورخولاردا نه تهر یاشاییب یاشاتسین؟
اؤلسون مو؟ اؤلدورسون مو؟

تبریز آغلییر قوجاغیمدا...
«بالاما قوربان ایلانلار بالام هاچان دیل آنلار»
قیزیلجاسینا تورکو شعر ایچیردیرم،
باش آغریسینا سریتدیرم اؤزومو،
بوغازینا آرازدان دامیزیرام،
قولاغینا
ساوالان زیروه سی‌نین دومانیندان پوفله‌ییرم؛
دمیردن باشماق
دمیردن چلیک
یولا قویولمالی...
باشماق ده‌لیننده، چلیک سورتولنده
بیر چشمه‌یه چاتاریق
اوردا
بیر گؤزل نار قیزینین عکسی سویا دوشرسه ...
آلدانما اونا
تبریز او دئییل

من ده اینانمام ملیک ممد دالیمجا تخت روان گؤندرسه
تبریز او دا دئییل
تبریز قوجاغیمدا آغلییر...