آنا صحیفه ادبیات |
Kult.az فایق قولیئوین "ساوالان" حکایهسینی تقدیم ائدیر:
ائلبوروس کیشینین اوچ اوغلو واردی. کیچیک اوغلو بوتؤولوک ساواشیندا کؤرفز اطرافیندا شهید اولموشدو. اوندان سونرا البوروسون ائله بیل بئلی قیریلمیشدی. گونو-گوندن ضعیفلهییب یاتاغا دوشموشدو. اوغلانلاری یاتاق خستهسی اولان آتالاری اوچون هر شئی ائدیر، باکیدان، تهراندان حکیملر گتیریب گؤستریر، آیلارلا معالیجهلر ائلتدیریردیلر. اما بیر فایداسی اولموردو کی، اولموردو. یئنه ده اومیدلرینی اوزمور، بیر علاج آختاریر، آتالارینی آیاغا قالدیرماغا چالیشیردیلار.
بیر گون بؤیوک اوغلو ائشیتدی کی، سلماسدا یاخشی بیر حکیم-پسیخولوق وار. سوراقلاشیب ساوالان آدلی بو حکیمی تاپدی و ائولرینه گتیردی. البوروس کیشی حکیمی گؤرهنده کئفی بیر آز دا کورلاندی. کؤنولسوز سلامینی آلدی.
ساوالان حکیم هوسله صحبت ائدیر، آرابیر ده سواللار وئرهرک البوروس کیشینین وضعیتینی اؤیرهنمهیه چالیشیردی. او، صحبتی گتیریب میللی آزادلیق حرکاتینا، بوتؤولوک موباریزهسینده میللتین گؤستردیی شجاعته چیخاراندا البوروس کیشینین حکیمه دقتی آرتماغا باشلادی. بو صحبتی دینلیکجه اونون یاواش-یاواش قیریشیغی آچیلیردی.
حکیم خیلی صحبتدن سونرا ائیوانا چیخدی. آردینجا گلن اوغلونا طرف دؤنوب دئدی:
- اونونلا هر گون بوتؤو و چیچکلنهن آذربایجاندان دانیشین. اوغلونون بوش یئره شهید اولمادیغینی، اونون کیمیلرین سایهسینده بو گونلره گلیب چاتدیغیمیزی هر گون خاطرلادین. من ده تئز-تئز گلهجهم.
* * *
البوروس کیشی چوخ ائرکن اویاناردی. اوغلو دا تئزدن دوروب اونونلا مشغول اولاردی. آوقوست آیینین ایستی گونلریندن بیری ایدی. عادتلری اوزره آتا و اوغول سحر دوروب ایواندا قلیان آلتی ائدیردیلر. کوچهدن گلن سس-کوی ایسه یاواش-یاواش آرتماغا باشلاییردی.
- او نه سسدیر؟ – دئیه البوروس کیشی سوروشدو.
- ساوالانی زیارت باشلاییب – دئیه اوغلو هوسله جواب وئردی.
آرتیق نئچه ایللر ایدی کی، آوقوست آییندا ساوالان داغی زیارت اولونوردو. آذربایجانین هر یئریندن بورا آخیشیردیلار. چادیرلار قورولور، اوزانلار اوخویور، گنجلر یاللی گئدیر، پهلوانلار گولشیردیلر.
- حاضیرلاشین بیز ده گئدک – دئیه البوروس کیشی باشینی قالدیردی.
اوغلونو ائله بیل ایلدیریم ووردو. نئچه ایللر ائودهن چؤله چیخماق ایستهمهیهن آتاسی ساوالان داغینا گئتمک ایستییردی. اوغلو تئز آشاغی دوشوب ماشینی حاضرلادی. هر ایکی اوغلو آتالاری ایله بیرلیکده یولا دوشدولر.
ساوالانا چاتاندا گون گونورتانی کئچمیشدی. اوغلانلاری ائلبوروس کیشینی آراباسیندا اوتوردوب چادیرلارینی قورماغا باشلادیلار. داغین باشیندا اوچرنگلی بایراق دالغالانیردی. بیر طرفده دؤولت و حکومت نمایندهلرینین چادیرلاری، او بیری طرفده تورک دؤولتلرینین هر بیرینین اؤز چادیری واردی. البوروس کیشی بایراغا باخاراق خیالا دالدی. ننهسینین باقرخان، پیشوری حاقیندا ناغیل کیمی دانیشدیقلاری، اؤزونون گنج یاشلاریندان موباریزهیه قوشولماسی، زیندانلاردا گؤردویو ظلملر، چکدیی اذیتلر، نهایت اوغلونون شهید اولما خبرینی آلماسینی خاطیرلادی. هامیسی کینو لئنتی کیمی گؤزلرینین اؤنوندن کئچدی. بایراغین محتشم فونوندا بو کینو اونو هارایاسا آپاریر، غرورلاندیریر، کؤورلدیردی. اؤزو ده باش آچا بیلمیردی کی، نه باش وئریر. تورپاغین اوستونه اوزانیب هؤنکورمک ایستییردی. تک اولسا ائدردی ده. اما اوغلانلارینین و اطرافداکی مینلرله اینسانین یانیندا اؤزونو ضعیف گؤرستمکدن قورخوردو...
ساوالان زیارتیندن سونرا البوروس کیشی یاخشیلاشماغا باشلادی. حتی ایکی-اوچ گوندن سونرا آیاغا دوروب گزه ده بیلیردی. ساوالان حکیم ده هردن گلیر، اونونلا صحبت ائدیردی. قونوم-قونشولار، تانیشلار دا اونا باش چکیردیلر.
بیر گون کؤهنه زیندان دوستلاریندان بیری ده اونون یانینا گلمیشدی. او، ائلبوروس کیشینی آیاق اوسته گؤروب چوخ سئویندی. قوجاقلاشیب گؤروشدولر. دوستو هیجان دولو سئوینجله دیللهندی:
- نئچه ایلدیر سنی یاتاقدا گؤرمک چوخ آغیریما گلیردی. نئچه ایللر بو میللتین جفاسینی جکدین، صفاسی گلنده یاتاغا دوشدون. بو گونلری گؤرمک ان چوخ سنین حاقیندیر. نه اولدو کی، بیردن بیره آیاغا قالخا بیلدین؟
البوروس کیشی باشینی آشاغی-یوخاری یئللهدهرک مودریک بیر طرزده جواب وئردی:
- منی ساوالان آیاغا قالدیردی!
هامی سئوینجله بیری-بیرینه باخدی. اما هئچ کیم بیلمهدی کی، البوروس کیشینی آیاغا قالدیران ساوالان حکیمدیر، یوخسا ساوالان داغی.
تاریخ
2019.02.04 / 20:44
|
مولف
آینورا مممدووا
|