کولت آذ گونئی‌لی شاعیر و یازار حامد یگانه پورون شعرینی تقدیم ائدیر:

اوزوم اوزومدن قوپوب قانادلانیرام
سهندین اتگیندن ، زیروه سینه باخیرام
بولود قارتال کیمی زیروه ده دولانیر
زیروه دن منه باخیر ،
ائلیمه باخیر
و سهندین اتگینده اسن یوخویا باخیر
گوزلریندن کیتاب کیتاب سوز دامیر ،
ده ده مین سوزون اوجادان هارای چکیر
ده ده مین سازین اوجادان سوزه گتیریر
هارای چکیر
آی ده لی دومرول ،
آی قوچاق نبی ،
آی کور اوغلو و آی تومروس آنا
سیز باری بیرده اویانیب باش قالدیرین
بو یورد یوخویا بورونوب !
بو ائل یوخویا به زنیب !
آی آشیق سن باری چال ،
اوجادان چال
بلکه سازین سسینه بو ائل اویانا ،
بلکه یوخلایانلار اویانا...