Kult.az گونئی‌لی شاعر آیریلمازین "بابک قالاسی کلیبر" آدلی شعرینی تقدیم ائدیر:

آتامیز بابکه کافر دئدیلر.
بیزده اولدوق داها کافر بالاسی.
آلنی داغلی دئمه چوخ کعبه سؤزون.
قیبله دیر تورکلره بابک قالاسی.

چالیشین

سام یئلی اسدی سارالدی یئنه داغلار لالاسی.
اسیر اولدو قودوز افشین لره آذر بالاسی.
چاغیریر ائللری یاردیملیقا بابک قالاسی.
چالیشین سینه سی وولکانلی جاوانلار چالیشن.
چکیلر اودلو دییاردان بو دومانلار چالیشین.

ائلیمین وار یوخو ظالیملر الیلن تالانیب.
غم کدر داغلی اورکلرده قالاق تک قالانیب.
بابکین شانلی دییاری یئنه ده پارچالانیب.
قاراباغ اؤلکه سینه وورغون اولانلار چالیشین.
چکیلر اودلو دییاردان بو دومانلار چالیشین.

گونده بیر داغ چکیلیر سینه ده داغلار چوخالیب.
گئدیب آزادلیقمیز ائلده قاداغلا چوخالیب.
باغلی قول باغلی آیاق باغلی دوداقلار چوخالیب.
ائلیمین قایدینا پیس گونده قالانلار چالیشین.
چکیلر اودلو دییاردان بو دومانلار چالیشین.

گؤزله یین داغ دره ده اووچو قوروبدور تله سین.
ایزله ییر داغدا آزاد جئیرانی قانه بله سین.
موعتصملر چوخالیب بابکی تکفیر ائله سین.
موعتصملر جانینا قورخو سالانلار چالیشین.
چکیلر اودلو دییاردان بو دومانلار چالیشن.

شووونیسم عؤمر بویو تورکه ایهانت ائله دی.
داشناکیلان قاراباغیمدا جینایت ائله دی.
رٱس قودرتده اولانلاردا حیمایت ائله دی.‌
وطنیم آزربایجانه یانانلار چالیشین.
چکیلر اودلو دییاردان بو دومانلار چالیشین.

اهریمنلر دیل آچیب ایندی اهورانی دانیر.
نه یامان گوندو بو گون دامجیدا دریانی دانیر.
چوخالیب یالتاق آدام آزربایجانی دانیر.
ائلیمه خور باخانین جانین آلانلار چالیشین.
چکیلر اودلو دییاردان بو دومانلار چالیشین.

دینمه مک دوشمانی حئیوان سایاقی ائتدی قودوز.
یارانین اوسته یارا ویردی تؤکوب اوستونه دوز.
شووونیسم داشناکیلان ال بیر اولوب آگاه اولوز.
حاققا خاطیر چالیشیب حاققی قانانلار چالیشین.
چکیلر اودلو دیاردان بو دومانلار چالیشین.

ییغیشین بیر یئره ال بیر اولوب ائلنن گئده یین.
یاندیراق بیرده یئنی موعتصمین داش اوره یین
قان وئریب اودلو دیاری بو گون آزاد ائده یین.
قوربت ائللرده منیم تک قوجالانلار چالیشین.
چکیلر اودلو دیاردان بو دومانلار چالیشین.