شیرین حیات

آتامین نیه بو قدر فیکیرلی اولماسی منی ناراحات ائدیردی، اما آلاجاغیم کیشمیشلرین هوه‌سی بو ناراحات‌لیغی بولاندیریب سیلیردی. گؤلون کنارین‌دا اوتوروب اونلاری تک-تک، دادینی چیخاراراق یئیجکدیم. بئله‌جه استراحتیم ده اوزون چکردی... آتام اوتاغا نیه گلدیی‌می آنلامیشدی. اوزومه باخیب ساکیتجه گولومسه‌دی. الی‌می الینین ایچینه آلیب اووجومو کیشمیشله دولدوردوقدا دهشته گلدیم. بیر اوووج!

ایلاهی، بو کیمه بس ائدر آخی؟ همین آن اونون دونیاداکی ان خسیس آتا اولدوغونو دوشونوب دیشلریمی قیجادیم. "کاش کی اللریم چوخ بؤیوک اولاردی. لاپ بو اوتاق قدر. اوندا، گؤروم، اووجومو نئجه دولدوراردین"- دئیه دوشوندوم. آتام دوشوندوکلریمی آنلامیش کیمی یانیم‌دا چؤملیب اوتوردو و الی‌می بوراخمادان دئدی:

-باخ، اوغلوم... حیات دا سنین چوخ سئودیین بو کیشمیشلر کیمی‌دیر. اونوتما، بیرجه دفعه و الین‌ده توتا بیلجیین قدر وئریلیر. نه آز، نه چوخ. اوندان دویمازسان، اما باشقالارییلا بؤلوشمک ده ایسته‌یه‌جکسه‌ن. اونا گؤره ده دوزگون اینسانلاری سئچمه‌لی‌سه‌ن. ائله اینسانلار کی، حیاتیندان بیر پارچا قوپاریب وئردیینه دیسین.

سؤزلر او قدر ساکیت و اورکدن دئییلیردی کی، بیر آنلیق هر شئیی اونودوب وار گوجومله آتامین دئدیکلرینه قاپیلدیم. اما باشیمی آشاغی سالیب اووجوما باخان‌دا هر شئی پوزولدو:

-آاا! قورد! سن منه قوردلو کیشمیش وئرمیسه‌ن!

-یوخ، علی، بو قورد دئییل، اوزومون چؤپلریدیر.

آتام سسیم‌دن دیسکینمیشدی. من ایسه آرتیق سوسموردوم:

-من تانیییرام اوزومون چؤپونو. بو قورددو، قورد.

نهایت، کیشمیشلرین آراسین‌داکی بالاجا قوردو گؤروب کنارا آتدی. آرتیق نه جدیلیگی قالمیشدی، نه ده فیکیرلری. آلنینی اوووشدوروب ساکیتجه گولمه‌یه باشلادی. دوداغینین آلتیندا "لعنت شیطانا" دئدیینی ائشیتدیم:

-چوخوموز دا ائله سنین کیمی ائدیریک، علی. حیاتین بیر آز چتینلیینی، قوردونو گؤره‌ن کیمی اونو آتیب قاچماق ایستییریک. اما بئله اولماز. اونو تمیزله‌مک لازیمدیر. سئومک لازیم‌دیر، علی.

اونون گولوشون‌دن هوسلنیب صحبته باشلادیم:

-آتا، منیم حیاتیم قوردلانسا، اونو سنه، آناما، یا دا دوستلاریما وئرمره‌م. ان خوشلامادیغیم آداملارا وئرره‌م، اؤزو ده دئمره‌م کی بو قوردلودور.

-یوخ، بئله ائتمه.

-ائدره‌م. اؤزوم ده تزه‌سینی گؤتورره‌م. سنین اوچون ده آلارام. بیر اوووج یوخ، لاپ چوخ.

-نیی آلارسان، علی؟ بیز کی حیات‌دان دانیشیریق و من سنه ایضاح ائتدیم کی بو بیزه بیرجه اوووج وئریلیر. بون‌دان آرتیق گؤتوره بیلمزسه‌ن. اونا گؤره ده سئچیملرینی دوزگون ائتمه‌لیسه‌ن.

-بس باشقالاری دا بیزه اؤز کیشمیش حیاتلارین‌دان وئره‌جک؟

-هه.

-بس اونلار قوردلوسونو وئرسه؟

-قوردلوسونو وئرسه، آلما.

-بس منی ایناندیرسالار؟ آلسام، اما سونرا بیلسه‌م کی قوردلودور؟
-یئمدیین مدتجه چتینلیک یاراتماز.
-بس...
بو صحبت تقریباً یاریم ساعت بئله‌جه داوام ائتدی. حیات حاقین‌دا نه قدر چوخ شئی اؤیرندییمین فرقین‌ده دئییلدیم. یاشا دولدوقجا آتامین نئجه حاق‌لی اولدوغونو آنلادیم. حیاتین شیرینلیینی، الیمیزده توتا بیلمسک بیزدن اوزاقلاشاجاغینی، اونو سئویب، تمیزله‌ییب دادینی چیخارماغین اؤزوموزدن آسیلی اولدوغونو داها یاخشی باشا دوشدوم. بیز آتاملا فیلملرده‌کی، کیتابلارداکی کیمی قیسا و گؤستریشلی دیالوقلار قورا بیلمدیک بلکه ده، اما بیرلیک‌ده چوخ شئی اؤیرندیک.
مؤلف : زومرود علیئوا