Kult.az علی نجفخانلینین " وطن" آدلی شعیرینی تقدیم ائدیر:

ان گؤزل پروازیم - باشینین اوست‌ده،

ان گؤزل اؤلوموم - دیزین‌ده، وطن!

اؤزون سیناغا چک منی بو سؤزده،

حؤکم ده سنین‌دیر، ایزن ده، وطن!

زهره دؤنوبدو بو هاوا، بو سو،

بیتیب-توکه‌نمه‌یه‌ن آغرین، آجین وار.

اولسون، حاقی-سایین حرامیم اولسون -

نئچه کی، قیصاصا احتیاجین وار.

ایگید اوغوللارین دئمه النمیش،

حاضیرام اوغرون‌دا یوز دفعه اؤلوم.

یاران بیتیشینجه، قانا بلنمیش

لاله بیتیره‌جک چمه‌نیم، چؤلوم.

منی عسگرلرین سیراسینا یاز،

اولوم اؤز یوردومون سنگر شاعری.

بیرجه میصراعسی دا خالقی یاریتماز

غیرت ترپتمه‌سه اگر شاعری.

گؤز داغی اولماسام، گؤزومدن اولوم،

اوزونه یاد کیمی باخانا، وطن!

سین‌سین دار آغاجی اولمایان قولوم،

سنی یاندیرانا، یاخانا، وطن!

بلدچی گؤزونده گؤر، هئچ اولماسا،

یاخشی تانیییرام او داغی، دوزو.

منه بیر قومبارا وئر، هئچ اولماسا،

بیر دوشمن پوستونو داغیدیم اؤزوم.

...ان گؤزل پروازیم - باشینین اوستده،

ان گؤزل اؤلوموم - دیزین‌ده، وطن!

اؤزون سیناغا چک منی بو سؤزده،

حؤکم ده سنین‌دیر، ایزن ده، وطن!