Kult.az گونئی آذربایجان‌لی شاعر ائلدار مغانلینین "سئوگی" شعرینی تقدیم ائدیر:

سئوگی
ائلدار مغانلی

گؤزلری نین نوروندا چیمدیم
دوداغیندان آخان نغمه‌لرله بزندیم.
بوروندوم گونشین ضیاسینا،
ساریلدیم نغمه‌لر دونیاسینا.
آسیلدی باخیشیندان باخیشلاریم.
رنگ آلدی گؤزلریندن سؤز ناخیشلاریم.
داغی سئودیم،
داشی سئودیم،
سئودیم اودو، اوجاغی
سئودیم آنا تورپاغی…

گؤزلری نین نوروندا چیمدیم،
دوداغیندان آخان نغمه‌لرله بزندیم،
قانادلاندیم بو گونومدن صاباحا؛
اوشدوم ….. اوشدوم…….
ماویلییه قوووشدوم.
گؤزه‌ل ایدی بوتون عالم،
سانیردیم کی خوشبختلرین خوشبختی‌یم.
سنی آندیم‌هاوالاندیم؛
سئودیم وطنی، سئودیم دونیانی.
سئودیم سنی، سئودیم انسانی.