Kult.az محمدحسئین شهریارین "ناز ائیلمیسن" آدلی شعیرینی تقدیم ائدیر:

چوخلار اینجیکدی کی، سن اونلارا ناز ائیله‌میسن،

من ده اینجیک کی، منیم نازیمی آز ائیله‌می‌سن.

ائتمی‌سن بو نازی ویرانه کؤنولده سلطان،

ائوین آباد اولا - درویشه نیاز ائیله‌میسن.

هر باخیش‌دا چالیسان کیپریی میضراب کیمی،

بیر قولاق وئر، بو سینیق کؤنلو نه ساز ائیله‌می‌سن.

باشدان آچ یایلیغی، افشان ائله سوسن-سونبول،

سن بیزیم بایرامیمیزسان، قیشی یاز ائیله‌می‌سن.

کاکیلی باشدا ووروب ائیله‌میسن تاج کیمی،

او قیزیل تئلدن اونو گوللو قوتاز ائیله‌می‌سن.

سن گون اول، قوی قمیمیز داغ‌دا قار اولسون، اریسین،

منیم آنجاق ایشیمی سوزو گوداز ائیله‌می‌سن.

سینه بیر دشتی-مغان‌دیر، قوزو یان-یانه یاتوب،

منیم آغلار گؤزومو اوردا آراز ائیله‌می‌سن.

خط خالین‌دان آلیب مشقیمی "قرآن" یازارام،

بو حقیقت‌ده منی اهلی-مجاز ائیله‌می‌سن.

دستماز ائیلدیین چشمه مسلمان قانی‌دیر،

بیلمیرم هانسی کلیسادا نماز ائیله‌می‌سن.

بو گؤزللیک کی، جهان‌دا سنه وئرمیش تانری،

هر قدر ناز ائل‌سه‌ن ائیله کی، آز ائیله‌می‌سن

من "اشیران" اوخوسام، پنجه "عراق" اوسته گزر،

گؤزلیم، تورک اولالی ترکی-"حیجاز" ائیله‌می‌سهن.

من بو معنادا غزل یازماغا حالیم یوخ ایدی،

سن منیم تک قوجانی فیرفیراباز ائیله‌می‌سن.

منی بو سوز ایله آتدین، آرالاندین، بیلیرم،

آرانی بیر پارا نامرد ایله ساز ائیله‌می‌سن،

ای دان اولدوز، منی سن یاخشی تانیرسان کی، سحر

اوفوقو خلوت ائدیب رازو نیاز ائیله‌می‌سن.

شهریار داردا قالیب، داغدا داشا دالدالانیب،

اؤزون اینصاف ائله، محمودی آیاز ائیله‌می‌سن.