کولت آذ ایسماعیل خرمی‌نین حیکایه‌سینی اوخوجولارینا تقدیم ائدیر:

«گونش، قیزل بارماقلارینی اوزادیب سس سیزجه سینه باجامی دؤیدو. قوش، قانادلارینی ساغا سولا اوزادیب بوینونو ایره لی یه دارتان کیمی، منده یاری اویاق، یاری یوخولو اولاراق قوللاریمی اوزادیب، بوینومو قاباغا وئریب وآغزیمی سونونا قدر آچیب باغلایاندان سونرا اؤزومو توپارلاییب، بو سینیق سالخاق یولا دوشدوم. سینیق سالخاق دیینده کیمسه مندن اینجیمه سین. و یا منه «سنون بو سینیق سالخاق یولدا نه ایشون وار» دییه دانلاماسین. یول، یولدور. اونون سینیغی دا وار سالخاقیدا وار دره سی ده، داغی دا وار. منیم سئچیمیم بودور. بلکه ده قسمتیم دیر. بیرده کی دوز یولدا ائله اوشاقدا شیللاق آتا - آتا یورویه بیلر، اوغول اودور کی سینیق سالخاق یولدا یوروسون. آنجاق بو یول منیم مقصدیم دئییلدی. یوللار نه ییمه لازیمدیر. یوللارین تانیمینی هامی بیلیر. بیر یئره چاتاندان سونرا، یوللاری قات بیر بیرینه چووالا ییغ – ییغیشدیر یادا اوستونه بیر قارا قلمله جیز چک. یول سنه نه دییه جک کی؟» یولدا یورویه رکن، یول یولداشیم، "عاریف"ین سؤزلریدی بونلار.
من اونون کیمی دئییل دیم. گونشی گؤزله مه دن، دوروب سحر ایشلریمی یئر به یئر ائدندن سونرا یولا دوشموشدوم. عاریف بوگون گئتدییمیز یولوموزو سینیق سالخاق سانسادا، من ائله دوشونموردوم. یول منه چوخ اؤنم داشییردی. هانسی یولو سئچمک اؤزو بیر پئشه کارلیق حساب ائدیله بیلردی. یولدا بودرویوب ییخیلماق، ایتمک، قورخماق، داغدان سویروشوب ییخیلیب دره لره دوشمک و بیر کره لیک،گئری یه قاییتماماق اولاسی دا واریدی. آنجاق بو یول سئچیمی منلیک دئییلدی. بو یولو، یول یولداشیم عاریفله ایکیمیز سئچمیشدیک.
عاریفدن سورانداکی؛ ندن بیز بو یولداییق؟ دئمیشدی کی؛ مقصده چاتماق اوچون. مقصدیمیزی بیلیردیم. بونا هئچ بیر شوبهم یوخیدی. آنجاق ندن سینیق سالخاق یول سئچدیینه، جوابی؛ اشی سنه نه فرق ائدیر، یول یولدور، ایره له مک لازیمدیر دییه، آددیملاریمیزی داهادا سرت آتیردیق. عاريف دئیردی:

"هانسی یوللا گئدیرسن گئت، او قده ر فرقی یوخدو. تکی زامان فرقی وار. بیری یورویه رک، بیری قاچا قاچا بیری اوچاقلا و بیری هر نه ایله گئدیرسه گئتسین، اؤنملی بودور کی ایسته دیین یئره چاتاسان" دوشانلا باغانین یاریشینی یادیما سالاراق، اونا قاتیلیردیم.
سئچیم اؤزموزون ایدی. گؤزومون بیری ایره لیده اولسادا، بیری آیاقلاریمدایدی. ایچینده قورباغا چنی باغلامیش، گؤل ویرمیش چالالار، داغدان آخان ایری داشلار و داریسقال یولدا بودره مک قورخوسو منی تئز تئز اؤزومه گتیریردی. نه یاخشی کی عاریف یانیمدایدی. هر بیر بودره مه ده الیمدن توتوب، ییخلماقدان قورویوردو. گوجوم توکه نن واختلار، ال آیاقدان چیخیردی. الیندن گله نی ائدیردی. منه قورخما دییه اورک وئریب گئتمه یه آیاق باغیشلاییردی. بو چتین یولدا برکه بوشا دوشوب، بیر آدام کیمی بؤیومه ییمی منه خاطیرلاییردی.

یول اوزه رینده بیر قاپییا توش گلدیک.نئچه گونلوک، آیلیق و اییللیک یولچولوغوموزون سونونا چاتمیشدیق. دئمک بو گئتدییمیز یولون سونودور. یولون آغریلیقلارینی و چتینلیکلرینی آرخا دا قویوب ایچیمده بیر دینجلمه اوز وئردی. آیاقلاریمیزدا گولوش، جانیمیزدا توختاقلیق و گؤزوموزده گؤرر بیر ایشق جانلاندی. بوتون چتینلیکلری آرخادا بوراخاراق، نه ده شیرین اولورموش بیر یئره چاتماق دییه عاریفه منتدارلیغیمی بیلدیردیم. قاپی، کؤهنه بیر شهرین گیریش قاپیسینا بنزه ییردی. قاپی آرخاسیندا اولانلاری دوشونوردوم. بیزدن تئز گلیب چاتانلاری. چاتانلارین ایشلرینی ساهمانا سالیب دینجلمکلرینی، یئئیب ایچدیکلرینی و یوخولارینی دوشونوردوم. بو یوللاردا اونلارین بوتون آغریلارینی گؤزومون قاباغینا آلیردیم. هله یولدا اؤلوب ایتنلر، جانیندان بئزنلر، داغلاردان سویروشوب دره لره ییخیلانلار و یولدان جایانلاری اونوتمامیشدیم. دئمک چاتمیشیق. چاتماق، بوتون آغریلارین سوزولوب جاندان تؤکولمه سی. چاتماق، آج بیر کؤرپه یه دؤشو دولو سوتلو آنانین قوجاغی. چاتماق، عاغیلا سیغمایان بیر شنلیک.

قاپینی نئچه کره دؤیدوک. آچان اولمادی. عاریف اؤز الیله ایکی تاغلی قاپینی قاباغا ایته لییب آچماغا باشلادی. قاپی آرخاسیندا اولانلارین قاباغیمیزا قاچیب خوش گلدین دییه سینی گؤزله مک دن باشقا بیر زاد دوشونموردوم. آچیلدی قاپی. گؤزلریمی دؤرد آچمیشدیم بیرینین یئرینه ایکی سیله باخماق ایستردیم. ایلان کیمی قیوریلان بیر اوز ون بوی یولدان باشقا، هئچ نه گؤرمه دیم.