کولت آذ گونئی‌لی شاعیره سحر خیاوینین شعرینی تقدیم ائدیر:

یئنه ده سریلیب گؤزلریمده چَن
یئنه ده داریخیر بو سنسیزلی « من»
داریخار بولبوللر اولماسا چمن
منیم سولغون گولوم؛ باهاریم آنا

کئچیر ایللر هله ساغالمیر داغین
دؤرد فصیل کؤنلومده خزاندیر باغین
بؤینو چیگنینده دیر بنؤشه طاغین
قرارسیز روحوما قراریم آنا

یئتیم دیر دفتریم؛ ساغیردیر الیم
دولاشیر شئعیریم؛ توتولور دیلیم
ایناندیم سن گئدن دوزویمیش اؤلوم
عؤمرومون معناسی؛ ووقاریم آنا

او پوزغون مزاری یاشیملا یویوم
داشینین اوستونه گول- چیچک‌ قویوم
سنه اوره ییمین آلماسین سویوم
آی غریب غوربتلی مزاریم آنا

بیر سولان گونشدیر آنالار آمان
بو یئردن تئز کؤچر سونالار آمان
بیر گونده گئده رلر بئله ناگومان
سیز آللاه آنازین قدرینی بیلین