Kult.az جابیر نووروزون "آنا، قوربان اولوم دعالارینا" آدلی شعیرینی تقدیم ائدیر:

آی آنا،دوشورسن تئز-تئز یادیما،

تزه‌دن دؤنوره‌م اوشاق اولورام.

دیزینه باش قویوب برک-برک یاتیرام.

بوتون قایغیلاردان اوزاق اولورام.

گؤروره‌م چینین‌ده یئنه ده چارشاب،

او باش‌دان دورموسان صبح نامازینا.

الین‌ده او اولو، مقدس کیتاب،

یئنه اوز توتموسان گؤیلره، آنا.

منی تاپشیریرسان اللها برک-برک،

تک بیرجه بالانی، شاعر اوغلونو.

دئییرسن؟ خودایا، اونا اول کؤمک،

خطادان،بلادان گؤزله سن اونو.

آنا، قوربان اولوم،دعالارینا،

تاپشیر،یاخشی تاپشیر اللها منی.

تاپشیر،یاخشی تاپشیر،آنا، آی آنا،

یوردوم تالانماسین بیر داها منیم.

کئچیم خانکندیندن،کرگیجاهاندان،

شهید تورپاقلاری باغریما باسیم.

شرلر قووولسونلار آذربایجان‌دان،

بیرجه جیینین ده تومو قالماسین.

آنا،قوربان اولوم دعالارینا،

اونلارین سئهرینی چوخ گؤرموشه‌م من.

ائله کؤرپه‌لیکدن آنا، آی آنا،

اونلارین سئهریله بؤیوموشه‌م من.

اوزاق سفرلره گئتدییم زامان،

گیزلینجه جیبیمه دعا قویاردین.

منی کئچیرردین قرآن آلتین‌دان،

سونرا مین دیل ایله اوووندوراردین.

او دعالاریندا بیر سیرر واردی،

منی هر بلادان قورتاراردیلار.

منی طیاره‌لر ساغ آپاراردی،

سلامت یانینا قایتاراردیلار.

آنا، قوربان اولوم دعالارینا،

تاپشیر، یاخشی تاپشیر، اللها منی.

تاپشیر،یاخشی تاپشیر،آنا، آی آنا،

بیر کیمسه سالماسین گناها منی.

بو بویدا کیشییه‌م آغیر آندا دا،

یئنه سن چاتیرسان دادیما، آنا.

منه دعا ائله مزاریندا دا

آنا، قوربان اولوم دعالارینا...

نجابتلی، ساوادلی، خئییرخواه نسلین له