کولت آذ گونئی‌لی شاعیر ایسماعیل خرمی‌نین شعرینی تقدیم ائدیر:

یولون آزمیش کولک‌لر الینده،
جیرها - جیرا دوشور.

آستاجا، دالبادالا
باشینی دووارا وورور-
غملی قاپی‌لار.
روحو اؤزوندن آیریلمیش-
یوخسول قاپی‌لار.
آیاغی بودره‌ییب
سویروشوب
ییخیلان قاپی‌لار.
سوسقوندور آددیملار!
قینینا گیریب آیاقلار!

بو -
ایچین - ایچین آغلایب،
باشینی دوورا ووران قاپی‌لار
بیز دئیلیک‌می؟

گؤزلریمیزه باخ.
گؤره بیلیریک‌می
صاباحدان بیر فوتوراف؟
آیاق ایزلریمیزه باخ.
الیندن یاپیشیب
گلن وارمی آرخامیزدان؟
اوره‌کلریمیزی دیندیر،
یورغون دئیل‌می
داشیدیغی یوکدن؟

یئنیل‌مه‌ییب می
بیزده حیات؟

چیخماییب‌می
چرچیوه‌میز یئریندن؟

اورمو گؤلونه
اوخشامیرمی سسیمیز؟

دوغودا دوشن
ساواش دئیل‌می
گونلریمیز؟

ال‌لریندن قارانلیق قوخومورمو
گونشین؟

کورپه لیک‌لریمیزی
آلمیرمی تورپاق؟

یاراق - یاراق
یاراقلانیب‌دی یارالاریمیز.

دوشونجه‌لریمیز
سوموکلریمیز کیمی
پاس ایچینده‌دیر.

صاباح ال‌لریمیزده
اؤلدو دییه‌سن!

روحو اؤزوندن آیریلمیش قاپی‌لار-
بیز دئیلیک‌می؟

داها قوزغون کولک‌لر
دوغولماییب هله.

بیزی هارا آپاریر
آرخاسیندا لئش بوراخان
بو جیرها - جیرلار؟