کولت آذ گونئی‌لی شاعیره سحر خیاوی‌نین شعرینی تقدیم ائدیر:

گلیرسن یاغیشلا،اوزون گون له سن
یاشیل اتگینده بیزه پای گتیر
گوزونده قیزدیران بیر پارلاق گونَش
تئلینده سایریشان اولدوز، آی گتیر

دیکسیندیر تورپاغی ناردَنَلنسین
نعمت لر یئر اوسته قوی سره لَنسین
ائلیمین باشینا روزی اَلَنسین
یاری یوخ ائلیمه سن تامای گتیر

گَل بَزه چیچَک له آرانی،باغی
سئوینجدن آغلاسین ووقارلی داغی
قوی تومورجوقلاسین یاتان بوداغی
گول له سئویشمگه بیر سونای گتیر

یادیندان چیخماسین مین قوجاق آرزی
گوزوموز یاشلی دیر،اوره ک تامارزی
یازگینان بو ایله یاشیل بیر یازی
یورغون چیگین لره بیر هومای گتیر

ائله زومزومه سال،نیسگیلی یانسین
سورگون دوشسون دردی بیزدن اوسانسین
اوره کدن بیر گولک غملر اوتانسین
قول-قولا،ال اله بیر هالای* گتیر

یاشین سیل ائلیمین گول یارپاغیلا
آجی دیر آغیزی نیسگیل،آغیلا
یایلا قول بویون گَل،قارپوز تاغیلا
آردینجا بول اللی،بیزه یای گتیر

آماندیر،ایشیقلیق بیرده باریشیق
توتوبدو دونیانی یامان قارانلیق
قوزغونون تویودو آلاتورانلیق
دونیایا نه دئییم نینای نای گتیر

بیر الده دوز چورک،بیر الده گولوش
اورکده سئویشمک،دوداقدا اوپوش
کابوسسیز بیر یاشام،دینج،بویالی دوش
هر نه گوزللیک وار،اونا تای گتیر