سکگیز مارس، دونیا قادینلار گونو باریش، برابرلیک و امنیت اوچون چالیشیب، ساواشان انسانلارا قوتلو اولسون.

«ایشگیلی سینمیش پاندورا» حئکایه‌سیندن کیچیک بیر بؤلوم

...

کیشی چوبوغویلا قالا قاپیسینا اشاره ائدیب آرتیردی: «رحمت‌لیک ننه‌م ناغیل ائلردی دوز ائله همین بو دروازانین یانینداکی حاصاردان داشناک‌لارین هجومونون قاباغینی آلدیلار. گویا ایندی من اوتوران یئر او زامان خندک ایمیش. داشناک‌لار خندکی آشیب ائله همین بو دروازانین یانینداکی دیواردان یوخاری قالخمیشدیلار. ننه‌م ناغل ائلردی کی او قوچاق قادین یایلیغینی آچیب کیشی‌لرین اوستونه آتماسایدی، بلکه ایندی بو شهرین آدی داشناکستان‌ ایدی.»
«سیزین رحمت‌لیک ننه تاریخ معلمه‌سی ایدی؟»
«گویا ننه‌م زری خانیم افشارین قوللوقچوسویموش. قدیم زامان گلین‌لرین جئهیزی اوسته بیر قوللوقچو دا یوللارمیشلار.»
اطرافا باخدیم. نه زری خانیم وار ایدی نه ده قوللوقچوسو. دییه‌سن هر ایکیسی ده زری‌ خانیمین یایلیغی کیمی سو اولوب، یئره گیرمیشدیلر.
دئدیم: «زری خانیم یایلیغینی آچیب قوروقچولارین اوستونه آتاندا سیزین رحمت‌لیک ننه ده یایلیغینی آچمیشدی؟»
منیم سؤزومه کیشی‌نین دوداغی قاچدی. یئنه او قوش یوواسی بیغ- ساققال آراسیندان گؤزه گؤروندو.
«سنجه او زامان قوللوقچونو آدام یئرینه قویارمیشلار؟»
کیشی حاقلیدیر. مه‌یر بورا اورپایمیش؟ مه‌یر زری خانیم و یا اونون قوللوقچوسو رزا لوکزامبورگ‌ یا دا کلارا زتکین ایمیش؟ بو قادینلار بیر عصرده یاشادیقلارینا دئییل، او زامان نه زری خانیم رزا ایله کلارانین وارلیغیندان خبری وار ایمیش نه ده اونلارین خبری وار ایدی اورتا دوغودا، خوی قالاسی آدلی بیر شهرده زری خانیم افشار کیمی تابولاری سیندیران بیر قادین یاشاییر.
دئییرم: «ایندیکی سیزین رحمت‌لیک ننه زری خانیمین قوللوقچوسویموش، یقین سیزه ناغل ائله‌ییب کی یاییلیغی قوروقچولارین اوزه‌رینه آتاندان سورا او یایلیق نئجه اولدو؟ سؤزون دوزو من زری خانیمین اؤزوندن علاوه اونون یایلیغینین دا ردینی آختاریرام.»
«قدیمدن دئییبلر اؤزگه‌ مالی بیر اوووز اولار، به‌یم اؤز باشینداکی یایلیق کاریوا گلمیر؟»