کولت آذ گونئی‌لی شاعیر قوجا مغانلی‌نین شعرینی تقدیم ائدیر:

بو شهرین -
اوستو اورتولو بازاریندا،
هر شئین اوستو اورتولودور،
هممشه بئله‌دیر:
« اورتولو بازار،! دوسلوقو پوزار »
ثانیه لره باغلی فیرلانان،
ساحات بازاری-
حیات بازاری-
دولاندیق هفته بازارلاری،
یئل چرشنبه سینده، توز قوپدو!
آی،! گوزگو،! آیدینلیقدیر دیه:
سو چرشنبه سینده!
سویا دویونله دیک، آرزیلار مورادین.
اود چرشنبه میز، قارا دوشدو!

دونیا بازارینا چیخدیق،
خرمن-خرمن یوکلنمیش،
کاروانی چکدیک.
ایچی یونولموش چکی داشی ایلا،
مرجی – ماشی!
اَیــری آرشینلا، آل قوماشـــی،
گون باتاندا ساتدیق.
گون چیخاندا آلدیق،
دولمادی چوالیمیز،
چیرکی گوروندو پارامیزین،
گوینه‌دی قابارلی اَللریمیز،
سیزلادی یارامیز! . . .
ساریقسیز،
چاریقسیز،
اؤتدو آذر، بهمن کیشی!
شاختا بابا،؛
گلدی، بایرام – نووروز- حاج فیروز!
هله‌ده . . . ! باخیــریـق،
« تکه‌م – تکه‌م » اوینونا.