ندنی اولمادان، الی سیلاحلی داریخمالار بئینیمی، اوره‌ییمی و بوتون جانیمی جایناغینا آلیب، گؤیدن یئره ووروردو. داریخما دئینده، آدامین باغری چاتلاییردی. باغریمدا یارانان چاتلاری آچیق‌جاسینا گؤره بیلیردیم. او چاتلارین آراسیندا، گیزله‌نیب ساخلانماق اولاردی. یئرین - گؤیون آغیرلیغی، داغ یئره چؤکن کیمی، منیم باشیما چؤکموشدو. سون گوجومله قیشقیریب باغیرماق ایسته‌ییردیم. هامیدان، قاچماق، قاچماق، و قاچماق پئشینده ایدیم. آدرسینی بیلمه‌ین بیر اوچاغا، قاطارا، گمی‌یه، اوتوبوسا مینیب و یا اسن یئله، آخار سویا قوشولوب اوزاقلاش‌ماغی؛ باشیمدا الک - قلبیر ائدیردیم.

آمما او قدر یئته‌نکلی اولمادیغیمی اعتراف ائده بیله‌رم. تک باشیما چاره سیز ایدیم. دوشونوب - داشینان‌دان سونرا، بیرینه زنگ وورمالی ایدیم. بیرینه‌کی، منیم کیمی داریخسین، منیم کیمی باغیرا بیلسین، منیم کیمی قاچماغی باجارسین. تئلفونو گؤتوروب بیر نومره‌نی توتورام:

- سلاملار عزیزیم نئجه‌سن؟
- ساغ اول من وارام. سن نئجه‌سن؟
- بوگون یامان داریخیرام. یاردیمینا احتیاجیم وار.
- خئیر اولا؟ گینه گمی‌لرین هانسی سولاردا باتیب؟
- هئچ اؤزومده، بیلمیرم. گل دانیشاق.
دسته‌یی آساندان سونرا داریخمالاریم داها چوخالدی. اؤز - اؤزومه دئدیم؛ کئشگه، زنگ وورمایایدیم. اؤزوم باشیمین چاره‌سینه باخاردیم. بیر سیگارئت یاندیردیم. بو عادی سیگارئت یاندیرماق دئییلدی. سیگارئتله بوغوشوردوم. اونون جانین، تک بیر نفسله آلماق ایسته‌ییردیم. دوداقلاریم‌لا، دیشیم‌له سیگارئتین جییار بوغارساغینی چیخاردیردیم. گرک زنگ وورمایایدیم. هامی بیر - بیریندن قاچیر من نییه اونو چاغیردیم! داریخمالاریم ‌دا آرتاجاق، اونودا داریخدیراجاغام. تک باشیما آیاغا دوروب بوش بیر یئر آختاریب داریخمالاریمی ساپا دوزوب، بیر - بیر دانیشمالیدیم. ایندیکی انسان‌لارین، هامیسی باشدان آیاغا داریخدیریجی‌دیر. هامی اؤز ایش - گوجونون و آغریلارینین، دالیسیجا قاچیر.
زنگ ویردیغیم آدام گلیب چاتمیشدی. آدی چوخ اؤنملي دئییل. تکی منیم کیمی اولسون یئتر. سیز اونا منیم دوستومدا دئیه بیلرسینیز. منده دوستوم دئسم بلکه یاخشی دوشدو. اؤپوش -گؤروشدن سونرا، گئتمه‌یه یئر آختاردیق. آداملاری توستو باسمیش شهر، هوره‌گن ایت اویلاغی اولان کوچه‌لر و باجالاری بارماقلیق‌دان هؤرونموش قارانلیق و دار - دودوگ اوتاق‌لار، ال وئریشلی دئییلدی. آزاد بیر یئر، یاشیل مئشه و سو قیراغی بلکه یاخشی اولاردی. بودا بیزیم یئرده، تکی آراز چای‌ینین آدینا و گؤرونوشونه یاراشیردی. آرازدان دا باشقا بیزیم هئچ نه‌ایمیز یوخ ایدی. بیزیم سیرداشیمیز و حتی غروروموز ا‌یدی. اودا بیزلری یاخشی تانییردی. واخت بئواخت قولاغینا دردلریمیزی، یالقیزلیغیمیزی، داریخمالاریمیزی، سئوینجیمیزی و هر نه‌ایمیزی دئمیشدیک. اوزاقدان بیزی گؤرنده بیلیردی نئیه گلمیشیک.
دوستوملا گئده - گئده چوخلو دانیشدیق. هردن من اونا غالیب گلیردیم، هردن او منه. من اونو دانلاییردیم، اودا منی. آرازا چاتمیشدیق. آغاجلار یاری چیلپاق یاری گئییملی ایدیلر. بوگونکو گئییم‌لرینین‌ ده، چوخونو ساری بویادان سئچمیشدیلر. آرا بیر اپریمیش یاشیل و قان بویاسینا بنزه‌ر یارپاقلار، گؤزه چارپیردی. انسان الیله یاندیریلمیش سئیره‌ک بؤیورتیکان کول‌لارینین و اوتولموش آغاجلارین آراسیندان کئچیب چای قیراغینا چاتدیق. اورتا یاشلی بیر کیشی تک باشینا، قیرماقلا بالیق توتوردو. من ایسته‌دیم یولوموزو آییریب باشقا یئرده اوتوراق، آنجاق دوستوم اونون یانینا گئتمه‌یی ایسته‌دی.
دوستوم باشلادی اونونلا دانیشماغا؛ بالیق توتوب توتماماغیندان، نئچه واختدیر بورا گلمه‌ییندن، ندن تک باشینا اولدوغوندان و ..... سوردو. بالیقچی دا دئدی؛ نئچه واختدیر هئچ نه توتماییب. یئنه دوستوم سوردو:
- اگر بالیق یوخدو واختینی ندن کورراییرسان؟

- واخت؟ مگر ایندی واختیندا ارزشی وار؟ شهرده قالیب اتم کشف ائله‌میه‌جم کی؟

- آخی بورالاردا هر جوره حیوانات وار. تک باشینا ...

دوستومون سؤزو یاریمچیق قالدی. بالیق توتان دئدی:

- بو حیوانلارین آراسیندا قالماق منه انسان‌لاردان یاخشی‌دی. بو حیوانلارلا ایشین اولماسا سنله ایشلری یوخدو. آنجاق شهرده سنون بیری ایله‌ده ایشون اولماسا سنله ایشلری وار.
من سوروشدوم:

- قارداش من سیزی یاخشی باشا دوشمه‌دیم. بیرآز آچیقلایا بیلرسن کی؛ هدفین ندی؟

- هدف؟ نه هدفی؟ منیم هدفیم یوخدو. من کیمم، هدفیم اولسون. بیز باشقالارینین هدفی‌ایک. و اونلارین هدفلرینی یئرینه یئتیریریک.

محمود:

بالیق توتانین دانیشیغیندان هر ایکیمیز تعجوبله‌نه‌رک، بیر- بیریمیزین اوزونه باخدیق. بوندان تعجوبلوسو‌ده، اونون قالان دانیشیق‌لاریدی. انسان‌لاری بیر کؤكلنميش روبات کیمی سانماغي و باشقالارينا فهله بير ساعات کیمی ایشله‌مه‌یی، بیز یئیب ایچدییمیز واختلار، اونلارین کؤکل‌مه‌سی کیمی دانیشیقلار، بیزی داها آرتیق شوکا سالیردی. بو شوکون آرخاسیندا منی بیر آز گولمک توتدو. بالیقچی‌نین بونا دا سؤزو واریدی:
- باخ سنون بو گولمه‌یینده، سنون دئیل. اینانمیرام بوندان لذت آلا بیله‌سن. سنینده، تک باشینا آراز قیراغینا گلمه‌یین و اؤز - اؤزونه دانیشماغین، گاه گولوب گاه میس‌میریق ساللاماغین هئچ بیری سنون دئییل.
اؤزومه ائله دالمیشدیم کی، منه یاخینلاشان سرحد کئشیک‌چیلرینین هاردان گلمه‌یینی دویمادیم. الی چیناغیما توخانیب؛ عمی تک باشینا بوردا نه گزیرسن، بیلمیرسن کی آراز قیراغینا گلمک یاساقدیر، دئینده، یاساق بیر یئرده داریخمالاریما، داریخدیغیمی آنلادیم.