کولت آذ گونئی لی شاعیر چالقین محمدین شعرینی تقدیم ائدیر:

یئتر بو قدر گل
لاپ گله بیلمه سنده
لاپ بو گلیش اوره گینی دئشسه ده
لاپ دا ،سونسوزلوغونو اللرینن ایمضالاساندا
سنین کی سویون اویاندا آخماز
گوزلرینده آخماسین اویانلاردا
گوزللیگین وئرنئخماسین گوزگولرده
ساچلارین دالغالانماسین تنهالیغین دنیزینده
بیلمیرم
بلکه ده بیلیرسن
شعیرلریم او قدر اوتانجاق دیلارکی
سنین یادیندا قالمازلار
منی،گوزلریمنن یاشییا بیلرسن
گوزلریمده،باخیشلاریننان اوزون بیر قاطار وار
گوزلریمده،سن گلن یوللارا یاغیش یاغیر آخشاملار
یئتر بو قدر گل
تانیشلیغیمیزین کپنک لری قانادلانیب لار
اوچورلار اوره گیمده یاندیردیغین ایشیغین هنده ورینده
باخیشلارینین گوندوزلریننن
گئجه لریمین دهلیزلرینده
خیاللار یووا قوروبلار
اومید آغاجیم
سنین آدینا آچیلمایان یاپراقلارینی توکور
سنه قو قوشونون توکلریننن باسدیردیغیم یاستیق
سنسیزلیکدن عذاب چکیر
یئتر بو قدر گل
بوردا بیر چیچک وار
قارانلیقدا جان وئریر
بوردا بیر کوچه وار
سنسیزلیک دن داریخیر
بوردا بیر جاوان وار
تنهالیقدان قوجالیر
لاپ الینده یاغین داشسادا
لاپ بو گلیش اوره گینی دئشسه ده
لاپ گله بیلمه سنده
گل