Kult.az روقییا کبیرینین "ماوایل" آدلی حکایه‌سینی تقدیم ائدیر:

شنبه

هفته‌نین ایلک گونودور. یئدی گوندور قاپینی اؤزومه قاپاتمیشام. بلکه ده بئله‌سی هامیمیزا ‏یاخشیدیر. اونلارین دؤره‌سینه دولانمیرام. قوی منی گؤرمه‌دن، مندن اوزاق، باری بیر آز تمیز نفس ‏چکسین‌لر.‏

پنجره‌دن باخیرام. ایکینجی قاتداکی دؤش‌سوز قونشوموز الینده ایکی بربری، آپارتمانا ساری گلیر. ‏اوغلوم کیتاب قولتوغوندا باخیشیمین دایره‌سیندن اوزاقلاشیر. اوچونجو قاتین پنجره‌سیندن باخاندا ‏اونون بویو اولدوغوندان دا بیرآز قیسا گؤرونور. اریم، ماشینی ایشله‌دیر. موتورون عکس صداسی ‏پنجره‌نین لکه‌لی، توزلو شوشه‌سینه توخونوب، گئری قاییدیر. ماشین یوللاندیقدا قولاقلاریم دینجه‌لیر.‏

شوشه‌نین لکه‌لری ائله بیل اللریمه باخیر. ایل بایرامینا آز قالیر. من‌سه کئف‌سیز، داماق‌سیزام، ‏سانکی آت باسیب، داشقاسی اوستومدن اؤتوب. ایش گؤرمک هوسی منده اؤلوب؛ یاشاماق ‏کیمی، گولمک کیمی…‏

اریم، اوغلوم، قیزیم، اوچو ده بیرگه گولنده، ائله‌ بیلدیم تنه‌بی‌نین دووارلاری اوستومه گلدی؛ قاچیب ‏اوتاغا گیرمه‌سیدیم، دووارلارین آراسیندا ازیلردیم.‏

ایگیرمی گوندن سونرا ائوه دؤنموشدوم. اوغلوم گوله-گوله دئدی: «هر نه‌یین همراهین ‏گؤرموشدوک، ماوالدان سونرا». اریم اؤسگوردو. او ایسه اؤزونه آلمادان پیققلداییب بیر ده دئدی ‏‏«دوغرودان گؤر نه یاخین‌لیقلاری وار! موبایل؛ ماوال…!»‏

من ده اوزونه گولدوم. گولوشومده بیلمه‌دیم نه‌ایدی پارتلادی. آغزیم زققتوْو دادی وئردی. گؤزلریمدن ‏ائله بیل بولاق شیرلادی.‏

اریم گؤزنو آغارتدی. قیزیم، اوغلومون قولونو چیمدیکله‌ییب «جهنم اول» دئدی. اوغلوم دورتمه ایله ‏قیزیمین بؤیروندن ووروب «نه دئییرم‌کی؟ ظارافات ائله‌ییرم داااا…هله شکیل چکیب، فئیس‌بوکا دا ‏قویاجام…»‏

بؤیرومده‌کی کیسه‌دن سس چیخدی. اوچو ده بیردن گولوشدولر. اؤزومون خبریم اولمادان یئل ‏بوراخمیشدیم. قاچیب یاتاق اوتاغینا گیردیم. قاپینی قیفیل‌لادیم.‏

پنجره نی آچیرام. بایرام آیی‌نین آغ یئلی پنجره‌نین تول‌ اؤرتویونو[۱] هاوادا اوینادیر. یاتاغیمین آغ ‏ملحفه‌لرینده گزیشیر. بیلیرم! یئل، نه قدر چاغلاییب، چیرپینسا دا، ائوده بوران جمدک قوخوسونو ‏اوتاقدان آپاراسی دئییل.‏

اؤز ایچیمده، اؤزلویومه داریخیرام. داریخدیقدا بارماقلاریم یازماغا جان آتیر. بیر آیدان آرتیق‌دیر بیر کلمه ‏اولسون بئله یازمامیشام. سانکی دوشونجه‌مین قاپیسی هؤرولوب. توزلو شوشه‌نین اوزرینده یازی ‏یازماغا هوس‌له‌نیرم. بارماغیم شوشه‌نین اوستونده اویناییر. شوشه‌نین توزوندا یازی‌نین ایزی ‏قالیر:«ماوایل»‏

بازار

مریض‌خانایا گئتد‌یگیم هفته‌نین ایکینجی گونویدو. گئدنده سئوینیردیم کی، قان‌سیزلیقدان، ‏خشکیّت‌دن، عذابدان قورتاراجاغام. دئییردیم بس سود گؤلونه دوشه‌جه‌یم. دوشدوم دا…اؤزو ده… ‏اوسته…. اوسته دایانا بیلمه‌دیم، ساغ بؤیروم اوسته دوشدوم.‏

جرّاح حکیم دئدی: «سیمینت‌دن دووار اولسایدی، بورغو[۲]ایله بیر ایش گؤرمک اولاردی، اما سنین ‏باغیرساغی‌نین یولو ائله دولوب، تیخانمیشدی کی، دولایی یول آچدیق!»‏

ایندی‌ ایسه دولایی یول بؤیرومدن باش آچیب. جمدک قوخوسو هر یانیمی بورویوب. پالتارلاریمی، ‏اوست-باشیمی، جانیمی، ساچلاریمدان بئله جمدک قوخوسو گلیر. گونده نئچه دفعه پنجره‌نی ‏آچیرام. عطیر-اودکلون دا قانیق وئرمیر. گئجه‌لر یاتا بیلمیرم. ساغ بؤیروم اوسته دوشسم دئییرم بس ‏بؤیرومدن قوپوب جالاناجاق. قورخومدان یاتاغیما پلاستیک سالمیشام. مریض‌خانادان دؤنن گون، ‏پلاستیکین خیشیلتی‌سیندان نه اؤزوم یاتا بیلدیم نه اریم. بیلمه‌دیم خیشیلتیدان ایدی، یوخسا پیس ‏قوخودان، اریم گئجه یاریسی سس‌سیز-سمیرسیز یورغان یاسدیغین گؤتوروب تنه‌بییه گئتدی. او ‏گئده‌ن قارداشدی کی، گئدیب.‏

دئدیم «اوتاغیماگلمه!» آنجاق ایکی آیاغین بیر باشماغا دورتدو کی دورتدو. «قول-بویون اولاجاغیق بو ‏گئجه» دئدی. نئجه ده قول-بویون اولدوق… ! همیشه کی کیمی دینمز-سؤیلمز سویوقدان بوزا ‏دؤنموش آیاقلاریمی قیزدیردی. قیزیشما آیاقلاریمدان بوتون جانیما یاییلدی. الی اویلوغومدا[۳] ‏دولاشاندا، جانیم گیزیلده‌دی. نئجه ده اوره‌ییمی ایسیتمیشدی. اوجاق کیمی ایستی اللری…! ‏باغرینا باسیب، اوزومدن اؤپنده، شرٌ داغارجیغی-بو شیشمیش کیسه ایکیمیزین آرامیزدا قالدی. ‏دیسکینیب، بیردن گئری چکیلدی. آغزین آچدی بیر سؤز دئسین؛ دینمه‌دی. اونا، وحشی‌جه‌سینه ‏ساریلماغیم گلدی. اونا دال چئوردیم. حیرصیمدن دوداقلاریمی گمیردیم.‏

یئنه پلاستیکین خیشیلتیسی بئینیمه دوشدو. بئلیم، کوره‌کلریم قیزیشدی. الی یاواشجا گئجه‌لییمین ‏یاخاسیندان سینه‌مین آلتیندا‌کی کیسه‌یه دَینده، الینی غیض ایله ائله چکدی کی، یاخاما توخوندو. ‏سانکی اییره‌نج بیر جاناوارا توخونموشدو.‏

یئنه گؤزلریمدن بولاق جوشدو. بیر داها پلاستیکین خیشیلتیسی گلدیکده، یاسدیق-یورغان الینده، ‏جین کیمی اوتاقدان ائشیگه چیخدی. ایکینجی قاتداکی دؤش‌سوز قونشوموز، یادیما دوشدو. ‏اللریمی سینه‌مده داراقلادیم. گؤزومون یاشی دووارداکی کوبلن تابلویا باخا-باخا قورودو. پنجره‌دن ‏سیزان ایشیغین آلتیندا، منه ائله گلیر کی، قیزیل‌ تایاقلارین[۴] آیاقلاری سویون ایچینده دئییل، ‏لؤهمه باتاقلیقدادی سانکی. بو تابلونو، ایللر اؤنجه ایلمه-ایلمه اؤز الیم‌له آرغامیشدیم.[۵].‏

آردی وار