Kult.az اورمییه‌نین مشهور آشیغی دده کاتیبین "تورکون اؤغلو تورکه‌م"آدلی شئیرینی تقدیم ائدیر:

بؤیوک اوزان قولونج‌لو دده کاتیب
تورکه‌م، تورکون اوغلویام.
یارادانین قودرتینه چوخ شوکور
ایسته‌ییب یارادیب اینسان اوغلونو.
یوردومو سئویرم،سویومو دانمام،
تورکه‌م، تورکون اوغلویام من.
سئویرم یوردومون قوچ اوغلانلارین،
اوستون شاعرلرین، خوش داستانلارین.
ساواش میدانین‌دا قهرمانلارین،
اوغرون‌دا باش وئره‌ن قوربان اوغلویام.
حاق آشیغی حاق‌دان آلار پایینی،
هدر گئتمز، بیلر عمرون سایینی.
قووالارام یوردوموزدان خاینی،
تولکودن قورخمارام، آسلان اوغلویام.

ترپنیر کؤنلوم‌ده دوغرو دویغولار،
قویمام یوردوموزا قونسون بایقوشلار.
منی قورخوتماز هر کیچیک سولار،
دالغالی دنیزده توفان اوغلویام.
دده کاتیب وطن عشقی جانیم‌دا،
غیرت داماریم‌دا، ایستی قانیم‌دا.
اؤلونجه دورموشام دوز پیمانین‌دا،
تورکه‌م، تورکون اوغلویام من.