کولت آذ گؤرکملی شاعر " بهمن وطن‌اوغلو"نون شعرینی اوخوجولارینا تقدیم ائدیر:

آللاهین ائوینه یول تاپیب ایبلیس
اینسانلارین دولانماغی چتیندی
بیر آرخین باشینی یوز دیو کسیبدی
بوستانلارین سولانماغی چتیندی.

داها روشوَت آلیر او فلک کیشی
او دا اؤز واختیندا گؤرمه‌ییر ایشی
قالیب قیامته یازین گلیشی
آخارلارین بولانماغی چتیندی.

قیشدا قار تاپیلمیر، یایدا قیش گیریر
واختین قاش_قاباغی یئری سوپورور
بیز کیبریت چکیریک؛ شیطان اوفورور
اوجاقلارین قالانماغی چتیندی.

دبه مینیب گده_گوده پئشه‌سی
بو درد اولوب قلبیمیزی دئشه‌سی
آرزولارین، اومیدلرین شوشه‌سی،
ائله سینیب، جالانماغی چتیندی.

دوست آرانی کسدی، گئتدی آ بهمن!
خزان یئلی اَسدی، گئتدی آ بهمن!
شادلیق، سئوینج کوسدو، گئتدی آ بهمن!
غم ائوینین تالانماغی چتیندی...